ദയാവധം ആവശ്യപ്പെട്ട് സര്‍ക്കാരിന് അപേക്ഷ നല്‍കി വയോധികന്‍

ദയാവധം അനുവദിക്കണം എന്നാവശ്യപ്പെട്ട് സര്‍ക്കാരിന് അപേക്ഷ നല്‍കി വയോധികന്‍. തിരുവനന്തപുരം ആക്കുളം സ്വദേശി കെ. പി ചിത്രഭാനു ആണ് ദയാവധം ആവശ്യപ്പെട്ട് രംഗത്തെത്തിയത്. കൈക്കൂലി നല്‍കാത്തതിനാല്‍ സ്വന്തം ഭൂമിയില്‍ വീട് വയ്ക്കാന്‍ അനുമതി ലഭിക്കുന്നില്ലെന്നാണ് പരാതി.
ആക്കുളത്തുള്ള തന്റെ വസ്തുവില്‍ മകന് വീട് വയ്ക്കുന്നതിന് വേണ്ടി കഴിഞ്ഞ ഡിസംബര്‍ മാസമാണ് ചിത്രഭാനു നഗരാസൂത്രണ വകുപ്പിനെ സമീപിച്ചത്. എന്നാല്‍ വീട് വയ്ക്കാന്‍ അനുമതി നല്‍കണമെങ്കില്‍ 30,000 രൂപ കൈക്കൂലി നല്‍കണമെന്ന് ഉദ്യോഗസ്ഥര്‍ ആവശ്യപ്പെട്ടതായാണ് ചിത്രഭാനു പറയുന്നത്. അതേസമയം ചില സാങ്കേതിക കാരണങ്ങള്‍ ഉദ്യോഗസ്ഥര്‍ ചൂണ്ടിക്കാട്ടുന്നതായും ചിത്രഭാനു പറയുന്നു. തിരുവനന്തപുരം മെഡിക്കല്‍ കോളെജ് വികസന പദ്ധതിയുമായി ബന്ധപ്പെട്ട ഭൂമിയില്‍ വരുന്നതാണ് പ്രസ്തുത സ്ഥലമെന്നും അതുകൊണ്ടുതന്നെ വീട് വയ്ക്കാന്‍ അനുമതി നല്‍കാനാകില്ലെന്നുമാണ് ഉദ്യോഗസ്ഥര്‍ പറയുന്നത്. പക്ഷേ അതേസര്‍വേ നമ്പറില്‍ വരുന്ന മറ്റൊരു ബ്ലോക്കില്‍ ഭൂമിയോട് ചേര്‍ന്നു കിടക്കുന്ന വസ്തുവില്‍ നിര്‍മാണ പ്രവര്‍ത്തനങ്ങള്‍ക്ക് ഉദ്യോഗസ്ഥര്‍ അനുമതി നല്‍കുകയും ചെയ്തിട്ടുണ്ട്.
മൂന്ന് കാര്യങ്ങളാണ് ചിത്രഭാനു സര്‍ക്കാരിനോട് ആവശ്യപ്പെടുന്നുണ്ട്. ഒന്നാമത്തെ കാര്യം വീട് വയ്ക്കാന്‍ അനുമതി നല്‍കുക എന്നതാണ്. അതിന് സാധിക്കില്ലെങ്കില്‍ സര്‍ക്കാര്‍ ഭൂമി ഏറ്റെടുക്കണം. അല്ലാത്ത പക്ഷം ദയാവധം അനുവദിക്കണമെന്നാണ് ചിത്രഭാനുവിന്റെ ആവശ്യം. സാമൂഹിക പ്രവര്‍ത്തകനാണ് ചിത്രഭാനു. അഴിമതിക്കെതിരെ പോരാട്ടം നടത്തുന്ന ആളു കൂടിയാണ്. അതുകൊണ്ടുതന്നെ കൈക്കൂലി നല്‍കി കാര്യം നേടാന്‍ കഴിയില്ലെന്നാണ് ചിത്രഭാനു പറയുന്നത്.