അധ്യാപികയെ കാറിനുള്ളില്‍ തീപൊള്ളലേറ്റ് മരിച്ച നിലയില്‍ കണ്ടെത്തി

യുവതിയായ അധ്യാപികയെ കാറിനുള്ളില്‍ തീപൊള്ളലേറ്റ് മരിച്ച നിലയില്‍ കണ്ടെത്തി. മരഞ്ചാട്ടി പ്ലാന്തോട്ടത്തില്‍ സ്വദേശി ബിജുവിന്റെ ഭാര്യ ദീപ്തിയെ (32) മാരുതി കാറില്‍ മരിച്ച നിലയില്‍ കണ്ടെത്തിയത്. കാരശ്ശേരി പഞ്ചായത്തിലെ ചുണ്ടത്തുംപൊയിലില്‍ ഇന്നലെ ഉച്ചക്ക് മൂന്നിനും മൂന്നരക്കുമിടയിലാണ് സംഭവം കാണുന്നത്. സീറ്റ് ബെല്‍റ്റിട്ട നിലയില്‍ ഡ്രൈവിംഗ് സീറ്റിലായിരുന്നു മൃതദേഹം കിടന്നിരുന്നത്. റോഡില്‍ നിന്ന് മാറിക്കിടന്നിരുന്ന കാറില്‍ നിന്ന് പുക ഉയരുന്നത് കണ്ട നാട്ടുകാരാണ് കാര്‍ പരിശോധിച്ചത്. കാറിലെ നാല് ഗ്ലാസും ഉയര്‍ത്തിവെച്ച നിലയിലായിരുന്നു.
മുക്കം പൊലീസ് സ്ഥലത്തെത്തി. പൊലീസ് പരിശോധനയില്‍ കാറിനുള്ളില്‍ കാര്യമായ തീപിടുത്തമുണ്ടായതായി കണ്ടെത്തിയിട്ടില്ല. കാറിനുള്ളില്‍ നിന്ന് പെട്രോള്‍ പോലുള്ള ദ്രാവകമുള്ളതായി തോന്നുന്ന കാനും തീപ്പെട്ടിയും പൊലീസ് കണ്ടെടുത്തു. ശ്വാസം മുട്ടി മരിച്ചതാണെന്നാണ് പൊലീസിന്റെ പ്രാഥമിക നിഗമനം.മുക്കം സിഐ എസ്.നിസാമിന്റെ നേതൃത്വത്തിലുള്ള സംഘം മൃതദേഹം മെഡിക്കല്‍ കോളെജിലേക്ക് മാറ്റി. മരഞ്ചാട്ടി ഇംഗ്ലീഷ് മീഡിയം സ്‌കൂള്‍ അധ്യാപികയായ ദീപ്തിക്ക് മൂന്ന് കുട്ടികളുണ്ട്.