നടി മാല്‍വി മല്‍ഹോത്രയെ കുത്തിപരിക്കേല്‍പ്പിച്ചു

വിവാഹാഭ്യര്‍ഥന നിരസിച്ചതിന് നടി മാല്‍വി മല്‍ഹോത്രയെ യുവാവ് കുത്തിപരിക്കേല്‍പ്പിച്ചു. നടി സഞ്ചരിച്ച കാര്‍ തടഞ്ഞായിരുന്നു ആക്രമണം. പരിക്കേറ്റ നടിയെ മുംബൈയിലെ ആശുപത്രിയില്‍ പ്രവേശിപ്പിച്ചു. തിങ്കളാഴ്ച രാത്രി മുംബൈ വെര്‍സോവയിലെ കഫേയില്‍നിന്ന് വീട്ടിലേക്ക് പോകുമ്പോഴായിരുന്നു സംഭവം. യോഗേഷ് കുമാര്‍ മഹിപാല്‍ എന്നയാളാണ് നടിയെ ആക്രമിച്ചത്. ആഡംബര കാറിലെത്തി നടിയെ ആക്രമിച്ച ശേഷം ഇയാള്‍ രക്ഷപ്പെട്ടു. ഇയാള്‍ക്ക് വേണ്ടി തിരച്ചില്‍ തുടരുകയാണെന്ന് പൊലീസ് പറഞ്ഞു. ഒരുവര്‍ഷമായി ഇരുവരും സൗഹൃദത്തിലായിരുന്നു. എന്നാല്‍ അടുത്തിടെ ഇയാള്‍ നടിയോട് വിവാഹാഭ്യര്‍ഥന നടത്തിയതിനെ തുടര്‍ന്ന് നടി ഇയാളുമായുള്ള സൗഹൃദം നിര്‍ത്തിയിരുന്നു. ഇതിന്റെ പ്രതികാരമായാണ് ഇയാള്‍ നടിയെ ആക്രമിച്ചത്.