തുര്‍ക്കി ഭൂചലനം: മരിച്ചവര്‍ 46 ആയി, 34 മണിക്കൂറിനു ശേഷം എഴുപതുകാരനെ രക്ഷിച്ചു

തകര്‍ന്ന കെട്ടിടാവശിഷ്ടങ്ങള്‍ക്കിടയില്‍ എഴുപതുകാരനായ അഹമ്മദ് സിറ്റിം കിടന്നത് 34 മണിക്കൂറാണ്. പക്ഷേ, അയാള്‍ പ്രതീക്ഷ കൈവിട്ടില്ല. ശരീരത്തില്‍ കെട്ടിടാവശിഷ്ടങ്ങള്‍ വീണുകിടക്കുമ്പോഴും ജീവന്‍ നിലനിര്‍ത്താമെന്നു പ്രതീക്ഷയുണ്ടായിരുന്നു. ഒടുവില്‍ രക്ഷാപ്രവര്‍ത്തകര്‍ അതു സാധ്യമാക്കി. പടിഞ്ഞാറന്‍ തുര്‍ക്കിയിലുണ്ടായ ഭൂകമ്പത്തില്‍ മണ്ണിനടയില്‍ പെട്ട ഇയാളെ ഇപ്പോള്‍ ആശുപത്രിയിലേക്കു മാറ്റിയിരിക്കുകയാണ്.ഇസ്മിര്‍ നഗരത്തിലെ തകര്‍ന്നു വീണ ഒമ്പതു കെട്ടിടാവശിഷ്ടങ്ങളില്‍ മൂന്നാം ദിവസവും തെരച്ചില്‍ തുടരുകയാണ്. കൂടുതല്‍ മൃതദേഹങ്ങള്‍ പുറത്തെടുത്തിട്ടുണ്ട്. ഇതോടെ ഭൂകമ്പത്തില്‍ മരിച്ചവരുടെ എണ്ണം 46 ആയി ഉയര്‍ന്നു. സംഭവത്തില്‍ പരുക്കേറ്റവര്‍ 900ല്‍ എത്തിയിട്ടുണ്ട്. കെട്ടിടാവശിഷ്ടങ്ങള്‍ക്കിടയില്‍ നിന്ന് 100ലധികം പേരെ രക്ഷപ്പെടുത്തി. നിരവധിപേര്‍ ഇപ്പോഴും കെട്ടിടാവശിഷ്ടങ്ങള്‍ക്കടയില്‍ കുടുങ്ങിക്കിടക്കുകയാണെന്നാണ് വിവരം. വെള്ളിയാഴ്ചയാണ് പടിഞ്ഞാറന്‍ പ്രവിശ്യയായ ഇസ്മിറില്‍ റിക്റ്റര്‍ സ്‌കെയിലില്‍ 7.0 തീവ്രത രേഖപ്പെടുത്തിയ ശക്തമായ ഭൂചലനം ഉണ്ടായത്. ഗ്രീക്ക് ദ്വീപായ സമോസിലെ തുറമുഖത്ത് ചെറിയ സുനാമി ഉണ്ടായതായി റിപ്പോര്‍ട്ടുകളുണ്ടായിരുന്നു. ഗ്രീസിന്റെയും തുര്‍ക്കിയുടെയും ഈജിയന്‍ തീരമാണ് ഭൂകമ്പത്തിന്റെ പ്രഭവകേന്ദ്രം.