വേല്‍മുരുകന്‍ ആയുധ ഫാക്ടറി കൊള്ളയടിച്ച കേസിലടക്കം പ്രതി: പൊലീസ്

പൊലീസുമായുണ്ടായ ഏറ്റുമുട്ടലില്‍ വയനാട്ടില്‍ കൊല്ലപ്പെട്ട മാവോയിസ്റ്റ് നേതാവ് വേല്‍മുരുകന്‍ ഒറീസയിലെ ആയുധ ഫാക്ടറി കൊള്ളയടിച്ച സംഘത്തിലെ മുഖ്യപ്രതിയെന്ന് പൊലീസ്. പൊലീസിന്റെ ആയുധപ്പുര കൊള്ളയടിച്ച മാവോയിസ്റ്റുകള്‍ തോക്കുകള്‍ മോഷ്ടിച്ചിരുന്നു. മൃതദേഹം കോഴിക്കോട് മെഡിക്കല്‍ കോളെജില്‍ എത്തിച്ചു.
പോസ്റ്റ്മോര്‍ട്ടം ബുധനാഴ്ച്ച നടക്കും. ബുധനാഴ്ച്ച വനത്തില്‍ ഫോറന്‍സിക് സംഘത്തിന്റെ പരിശോധനയും നടക്കും. വയനാട്, കോഴിക്കോട്, കണ്ണൂര്‍, പാലക്കാട് ജില്ലകളിലെ വിവിധ പൊലീസ് സ്റ്റേഷനുകളിലായി ഒന്‍പത് കേസുകള്‍ വേല്‍മുരുകനെതിരെ ഉണ്ട്. തമിഴ്നാട്ടിലും വേല്‍മുരുകനെതിരെ നിരവധി കേസുകള്‍ നിലവിലുണ്ട്.കൊല്ലപ്പെട്ടത് വേല്‍മുരുകനാണോ എന്ന് സ്ഥിരീകരിക്കാന്‍ ഡിഎന്‍എ പരിശോധന നടത്തുമെന്ന് വയനാട് എസ്പി ജി പൂങ്കുഴലി പറഞ്ഞു. ഇയാളുടെ ബന്ധുക്കള്‍ ഇതുവരെ സമീപിച്ചില്ല. സുരക്ഷാ കാരണങ്ങള്‍ മുന്‍നിര്‍ത്തിയാണ് മാധ്യമങ്ങളെ കയറ്റി വിടാതിരുന്നത്. ഒരാള്‍ക്ക് പരിക്കേറ്റത് സംബന്ധിച്ച് വ്യക്തതയില്ല. പൊലീസില്‍ ആര്‍ക്കും പരിക്കില്ല. ബാലിസ്റ്റിക് വിദഗ്ദ്ധരുടെ സംഘം സ്ഥലത്ത് പരിശോധന നടത്തും.