ശരണ്യയ്ക്ക് കീഴില്‍ ഭരതനാട്യം അഭ്യസിച്ച് സിമ്പു

തെന്നിന്ത്യന്‍ പ്രേക്ഷകരുടെ എക്കാലത്തെയും റൊമാന്റിക് ഹീറോയാണ് സിമ്പു. അഭിനേതാവ് എന്നതില്‍ ഉപരി സംവിധായകനും മികച്ച ഗായകനുമാണ് അദ്ദേഹം. കോളിവുഡിലെ ക്രോണിക് ബാച്ചിലറായ സിമ്പുവിന്റെ പുതിയ ചിത്രം സോഷ്യല്‍ മീഡിയയില്‍ വൈറലാവുകയാണ്. ദിവസങ്ങള്‍ക്ക് മുന്‍പായിരുന്നു താരത്തിന്റെ പുതിയ ലുക്ക് പുറത്തു വന്നത്. അതിന്റെ ആഘോഷം കഴിയുന്നതിന് മുന്‍പാണ് പുതിയ ചിത്രം എത്തിയിരിക്കുന്നത് .
ഇത്തവണ സമൂഹമാധ്യമങ്ങളിലും സിനിമ കോളങ്ങളിലും പ്രചരിക്കുന്നത് താരത്തിന്റെ പുതിയ ഗെറ്റപ്പല്ല. നല്ല ചിട്ടയുള്ള വിദ്യാര്‍ഥിയായിയിട്ടാണ് നടന്‍ പ്രത്യക്ഷപ്പെട്ടിരിക്കുന്നത്.നടി ശരണ്യ മോഹന് കീഴില്‍ ക്ലാസിക്കല്‍ നൃത്തം അഭ്യസിക്കുകയാണ് ചിമ്പു. ശരണ്യയുടെ കീഴില്‍ ചിമ്പു ഭരതനാട്യം അഭ്യസിക്കുന്ന ചിത്രം സമൂഹ മാധ്യമങ്ങളിലും സിനിമ കോളങ്ങളിലും വൈറലായിട്ടുണ്ട്.
എന്നാല്‍ ഈ ചിത്രത്തിനെ കുറിച്ചുള്ള മറ്റ് വിവരങ്ങളൊന്നും ലഭിച്ചിട്ടില്ല. പുതിയ ചിത്രത്തിന് വേണ്ടിയാണോ നൃത്തം അഭ്യസിക്കുന്നതെന്നാണ് പ്രേക്ഷകര്‍ ചോദിക്കുന്നത്. സുശീന്ദ്രന്‍ സംവിധാനം ചെയ്യുന്ന 'ഈശ്വരനാണ് സിമ്പുവിന്റെ പുതിയ ചിത്രം. ചിത്രത്തിന് വേണ്ടി നടന്‍ ശരീര ഭാരം കുറച്ചിരുന്നു. എന്നാല്‍ ലോക്ക് ഡൗണ്‍ ആയതോടെ ശരീര ഭാരം വീണ്ടും വര്‍ധിച്ചിരുന്നു.
പിന്നീട് വര്‍ക്കൗട്ടിലൂടെ ശരീര ഭാരം കുറയ്ക്കുകയായിരുന്നു. സെലിബ്രിറ്റി ഫിറ്റ്‌നസ് പരിശീലകനായ സന്ദീപ് രാജാണ് സിമ്പുവിന്റെ ട്രെയിനര്‍. 101 കിലോ ആയിരുന്നു നടന്റെ നിലവിലെ ശരീര ഭാരം 71 കിലോയാണ്.സിമ്പു എടുത്ത കഠിന പ്രയത്‌നത്തിനെ കുറിച്ച് ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തില്‍ സന്ദീപ് രാജ് പറഞ്ഞിരുന്നു, പുലര്‍ച്ചെ 4.30 മുതല്‍ സിമ്പു ജിം വര്‍ക്കൗട്ടുകള്‍ ആരംഭിക്കും. ആഴ്ചയില്‍ അഞ്ച് ദിവസവും വ്യായാമങ്ങള്‍ക്കായി മാറ്റിവെയ്ക്കുന്നതിനൊപ്പം കൃത്യമായ ഡയറ്റും പിന്തുടരുന്നു. നോണ്‍-വെജ്, ജങ്ക് ഫുഡ് പൂര്‍ണമായും ഉപേക്ഷിച്ചു.
സാലഡുകള്‍ പോലുള്ള പോഷക?ഗുണങ്ങളുളള ഭക്ഷണങ്ങളിലേക്ക് മാറി. ജിം വര്‍ക്കൗട്ട് കൂടാതെ ടെന്നീസ്, ബോക്‌സിംഗ്, റോയിംഗ്, നീന്തല്‍, ബാസ്‌കറ്റ്‌ബോള്‍ തുടങ്ങിയവയും പരിശീലിച്ചു. കൃത്യമായ വ്യായാമത്തിലൂടെയും ഭക്ഷണക്രമങ്ങളിലൂടെയുമാണ് സിമ്പു തന്റെ ലക്ഷ്യത്തിലെത്തിയതെന്ന് ട്രെയ്‌നര്‍ സന്ദീപ് കൂട്ടിച്ചേര്‍ത്തു.