കൈക്കൂലി വാങ്ങുന്നതിനിടെ 2 വനിതാ റവന്യൂ ഉദ്യോഗസ്ഥരെ വിജിലൻസ് അറസ്റ്റ് ചെയ്തു

ചങ്ങനാശേരി നഗരസഭ ഓഫിസിൽ വിജിലൻസ് നടത്തിയ മിന്നൽ പരിശോധനയിൽ കൈക്കൂലി വാങ്ങുന്നതിനിടെ റവന്യൂ ഉദ്യോഗസ്ഥർ അറസ്റ്റിലായി. ചങ്ങനാശേരി നഗരസഭയിലെ റവന്യു ഇൻസ്പെക്റ്റർ ചെങ്ങന്നൂർ പാണ്ടനാട് പുതുശേരി വീട്ടിൽ സി.ആർ ശാന്തി (50), റവന്യൂ ഓഫിസർ കോഴിക്കോട് വെസ്റ്റ്ഹിൽ സൂര്യകിരൺ വീട്ടിൽ പി.ടി സുശീല (52) എന്നിവരെയാണ് ബുധനാഴ്ച വൈകിട്ട് വിജിലൻസ് എസ്.പി വി.ജി വിനോദ്കുമാറിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. കാനഡയിൽ ജോലി ചെയ്യുന്ന ചങ്ങനാശേരി സ്വദേശി നാട്ടിൽ നിർമ്മിച്ച വിടിന്റെ ഒക്യുപെൻസി സർട്ടിഫിക്കറ്റിനായി ഇദ്ദേഹത്തിന്റെ ജീവനക്കാരൻ ചങ്ങനാശേരി നഗരസഭ ഓഫിസിൽ ചെന്നിരുന്നു. സർട്ടിഫിക്കറ്റിനായി‌ 35000 രൂപയും അടച്ചിരുന്നു. 3500 രൂപ കരമായി അടയ്ക്കാൻ റവന്യൂ ഓഫിസർ സുശീല നിർദ്ദേശിക്കുകയും ചെയ്തിരുന്നു. പിന്നീട് സുശീലയും റവന്യു ഇൻസ്പെക്റ്റർ ശാന്തിയും, കരം അടയ്ക്കണമെങ്കിൽ 5000 രൂപ കൈക്കൂലി തരണമെന്ന് ഇദ്ദേഹത്തോട് ആവശ്യപ്പെടുകയായിരുന്നു. തുടർന്ന് കാനഡയിലുള്ളയാളുടെ ജീവനക്കാരൻ കൈക്കൂലിയുമായി ബുധനാഴ്ച ഓഫിസിൽ എത്തി. സുശീലയുടെ നിർദ്ദേശപ്രകാരം ശാന്തി ഈ തുക കൈപ്പറ്റുന്നതിനിടെ വിജിലൻസ് ഇവരെ പിടികൂടുകയായിരുന്നു.