ജയില്‍ മകനെ കൊലപ്പെടുത്തി കെട്ടിത്തൂക്കി’, ആരോപണവുമായി പിതാവ്

കട്ടപ്പന നരിയംപാറ പീഡനക്കേസിലെ പ്രതി മനു മനോജ് ജയിലില്‍ ആത്മഹത്യ ചെയ്ത സംഭവവുമായി ബന്ധപ്പെട്ട് ഗുരുതര ആരോപണവുമായ ബന്ധുക്കള്‍ രംഗത്ത്. മനുവിനെ ജയില്‍ ജീവനക്കാര്‍ കൊലപ്പെടുത്തി കെട്ടിത്തൂക്കിയതാണെന്നും രണ്ട് പേരുടെ ജീവനെടുത്തത് സാമൂഹ്യമാധ്യമങ്ങള്‍ വഴിയുള്ള ബിജെപിയുടെ രാഷ്ട്രീയ കളിയാണെന്നും അച്ഛന്‍ മനോജ് ആരോപിച്ചു. ജയിലിലെ മരണത്തില്‍ വിശദമായ അന്വേഷണം വേണമെന്ന് കുടുംബം ആവശ്യപ്പെട്ടു.
'മനുവും പെണ്‍കുട്ടിയും പ്രണയത്തിലായിരുന്നു. പ്രായപൂര്‍ത്തിയായാല്‍ വിവാഹം നടത്താന്‍ രണ്ട് വീട്ടുകാരും ചേര്‍ന്ന് തീരുമാനിച്ചതാണ്. എന്നാല്‍ പിന്നീട് പെണ്‍കുട്ടിയുടെ ബന്ധുവായ പൊലീസ് ഉദ്യോഗസ്ഥന്‍ ഇടപെട്ട് കേസ് നല്‍കുകയായിരുന്നു. ഇയാളാണ് കേസിന് പിന്നില്‍ പ്രവര്‍ത്തിച്ചത്. ഇയാളുടെ സമ്മര്‍ദ്ദത്തില്‍ ജയില്‍ ജീവനക്കാര്‍ മനുവിനെ കൊലപ്പെടുത്തി കെട്ടിത്തൂക്കിയതാണെന്നും മനോജ് ആരോപിച്ചു.
ബിജെപി പ്രശ്‌നത്തെ രാഷ്ട്രീയവത്ക്കരിക്കാന്‍ ശ്രമിച്ചതാണ് രണ്ട് കുട്ടികളുടെ ജീവന്‍ എടുത്തതെന്നും മനോജ് ആരോപിച്ചു. 'ബിജെപിയുടെ നവമാധ്യമങ്ങളിലെ പ്രചാരണത്തില്‍ മനംനൊന്താണ് പെണ്‍കുട്ടി ആത്മഹത്യക്ക് ശ്രമിച്ചത്'. മുഖ്യമന്ത്രിക്ക് പരാതി നല്‍കുമെന്നും മനോജ് വ്യക്തമാക്കി.മരിച്ച മനു നരിയമ്പാറയില്‍ ഓട്ടോ ഡ്രൈവറായിരുന്നു. റിമാന്‍ഡില്‍ കഴിയവേ ജയിലിന്റെ മൂന്നാം നിലയിലേക്ക് പോയ മനു ഏറെ സമയം കഴിഞ്ഞും തിരിച്ചുവരാത്തത് ശ്രദ്ധയില്‍പെട്ട ജീവനക്കാര്‍ നോക്കിയപ്പോള്‍ തൂങ്ങിയ നിലയില്‍ കണ്ടെത്തുകയായിരുന്നുവെന്നാണ് ജയില്‍ അധികൃതര്‍ നല്‍കിയ വിശദീകരണം. ആത്മഹത്യയ്ക്ക് ശ്രമിച്ച പീഡനത്തിന് ഇരയായ പെണ്‍കുട്ടിചികിത്സയില്‍ കഴിയവേ മരണത്തിന് കീഴടങ്ങിയിരുന്നു. മരിച്ച മനു മനോജിന്റെ പോസ്റ്റുമോര്‍ട്ടം ഇന്ന് കോട്ടയം മെഡിക്കല്‍ കോളേജില്‍ നടക്കുന്നു.