മുന്‍ അമീറിന്റെ വിയോഗത്തോടെ ഏര്‍പ്പെടുത്തിയ ദുഃഖാചരണം ഇന്ന് അവസാനിക്കും

മുന്‍ കുവൈത്ത് അമീര്‍ ശൈഖ് സബാഹ് അല്‍ അഹ്മദ് അല്‍ ജാബിര്‍ അസ്സബാഹിന്റെ വിയോഗത്തോടെ രാജ്യത്ത് ഏര്‍പ്പെടുത്തിയ 40 ദിവസത്തെ ദുഃഖാചരണം ശനിയാഴ്ച അവസാനിക്കും. മൂന്ന് ദിവസത്തെ അവധിയും 40 ദിവസത്തെ ദുഃഖാചരണവുമായിരുന്നു പ്രഖ്യാപിച്ചത്. പൊതു ആഘോഷങ്ങള്‍ക്ക് ഏര്‍പ്പെടുത്തിയിരുന്ന വിലക്ക് നീങ്ങുമെങ്കിലും കോവിഡ് പശ്ചാത്തലത്തില്‍ ഒത്തുചേരലിനുള്ള വിലക്ക് തുടരും. കുവൈത്തിലെ വിവിധ മന്ത്രാലയങ്ങളില്‍ സ്ഥാപിച്ചിരുന്ന ശൈഖ് സബാഹ് അല്‍ അഹ്മദ് അല്‍ ജാബിര്‍ അസ്സബാഹിന്റെ ബോര്‍ഡുകള്‍ ശനിയാഴ്ച വൈകീട്ട് നീക്കും.
പുതിയ അമീര്‍ ശൈഖ് നവാഫ് അല്‍ അഹ്മദ് അല്‍ ജാബിര്‍ അസ്സബാഹിന്റെയും കിരീടാവകാശി ശൈഖ് മിശ്അല്‍ അല്‍ അഹ്മദ് അല്‍ ജാബിര്‍ അസ്സബാഹിന്റെയും ചിത്രങ്ങളാണ് ഇനി മന്ത്രാലയങ്ങള്‍ക്ക് അലങ്കാരമാവുക. സര്‍ക്കാര്‍ ഓഫിസുകളിലെ ചിത്രങ്ങള്‍ നീക്കുമെങ്കിലും ജനമനസ്സുകളില്‍ ശൈഖ് സബാഹ് അല്‍ അഹ്മദ് അല്‍ ജാബിര്‍ അസ്സബാഹ് എന്നും ജ്വലിക്കുന്ന ചിത്രമാവും.
വലിയ വെല്ലുവിളികളുടെ കാലത്ത് കുവൈത്തിനെ പുരോഗതിയുടെയും സമാധാനത്തിന്റെയും പാതയില്‍ നയിച്ചത് ചരിത്രത്തില്‍ രേഖപ്പെട്ടുകഴിഞ്ഞു. അന്താരാഷ്ട്ര തലത്തില്‍ പൊതുസ്വീകാര്യനായ നയതന്ത്ര പ്രതിനിധിയുടെ സ്ഥാനമായിരുന്നു മുന്‍ അമീറിനുണ്ടായിരുന്നത്. അദ്ദേഹത്തിന്റെ വിയോഗം സൃഷ്ടിച്ച വിടവ് എളുപ്പം നികത്താനാവില്ല. ഭാരിച്ച ഉത്തരവാദിത്തമാണ് പുതിയ നേതൃത്വത്തിന് മുന്നിലുള്ളത്.
മൊത്തം ലോകം വലിയ വെല്ലുവിളിയുടെ കാലത്തിലൂടെ കടന്നുപോവുമ്പോള്‍ കുവൈത്തിന് മാത്രം ഇതില്‍നിന്ന് ഒഴിഞ്ഞുനില്‍ക്കാനാവില്ല. അതേസമയം, ദീര്‍ഘനാളത്തെ ഭരണ പരിചയവും കിരീടാവകാശിയെന്ന നിലയില്‍ മുന്‍ അമീര്‍ ശൈഖ് സബാഹ് അല്‍ അഹ്മദ് അല്‍ ജാബിര്‍ അസ്സബാഹിന്റെ തോളോടുതോള്‍ ചേര്‍ന്ന് നിലകൊണ്ടതിന്റെയും അനുഭവസമ്പത്ത് പുതിയ അമീറിന് സഹായകമാവും. ഇത് കൈമുതലാക്കി പുതിയ ഉയരങ്ങളിലേക്ക് രാജ്യത്തെ നയിക്കാന്‍ അദ്ദേഹത്തിന് കഴിയുമെന്നുതന്നെയാണ് പ്രതീക്ഷ.