ബിഹാറില്‍ വോട്ടെണ്ണല്‍ നാളെ; കോണ്‍ഗ്രസ് സ്ഥാനാര്‍ത്ഥികള്‍ റിസോര്‍ട്ടില്‍

ബിഹാറില്‍ നിയമസഭയിലേക്ക് നടന്ന തെരഞ്ഞെടുപ്പില്‍ നാളെ വോട്ടുകള്‍ എണ്ണും, എക്സിറ്റ് പോള്‍ ഫലങ്ങള്‍ അനുകൂലമായതിന്റെ പശ്ചാത്തലത്തില്‍ ഏറെ പ്രതീക്ഷയോടെയാണ് ആര്‍ജെഡി- കോണ്‍ഗ്രസ് ക്യാമ്പ് തെരഞ്ഞെടുപ്പ് ഫലത്തെ പ്രതീക്ഷിക്കുന്നത്. ചാണക്യ ന്യൂസിന്റെ സര്‍വേയില്‍ 180 മുതല്‍ 200 വരെ സീറ്റുകള്‍ നേടി മഹാസഖ്യം അധികാരത്തിലേറുമെന്നാണ് പറയുന്നത്. മറ്റ് സര്‍വേകളെല്ലാം തന്നെ മഹാസഖ്യം അധികാരത്തില്‍ എത്തുമെന്നാണ് പ്രവചിച്ചിരിക്കുന്നത്. 243 അംഗ നിയമസഭയില്‍ ഭരിക്കാന്‍ 120 സീറ്റുകള്‍ മതിയാവും. കേവല ഭൂരിപക്ഷം അനായാസം നേടിയെടുക്കാം എന്നാണ് മഹാസഖ്യത്തിന്റെ കണക്ക് കൂട്ടല്‍, എന്‍ഡിഎ ക്യാമ്പില്‍ തുടര്‍ ഭരണ പ്രതീക്ഷകള്‍ക്ക് ജീവനില്ല. മൂന്ന് തവണ മുഖ്യമന്ത്രി സ്ഥാനം വഹിച്ച നിതീഷ് കുമാറിനെ ജനങ്ങള്‍ക്ക് മടുത്തു എന്നാണ് സൂചനകള്‍. നാളെ രാവിലെ എട്ട് മുതല്‍ വോട്ടെണ്ണല്‍ ആരംഭിക്കും, ഉച്ചക്ക് പന്ത്രണ്ടോടെ മുഴുവന്‍ ഫലങ്ങളും അറിയാന്‍ സാധിക്കും. ബിജെപിയുടെ അട്ടിമറി സാധ്യത കണക്കിലെടുത്ത് കോണ്‍ഗ്രസ് സ്ഥാനാര്‍ത്ഥികളെ പട്‌നയിലും രാജസ്ഥാനിലുമുള്ള റിസോര്‍ട്ടുകളിലേക്ക് മാറ്റിയിട്ടുണ്ട്.