കെ സുരേന്ദ്രന്‍ ഡല്‍ഹിയില്‍ ; കേന്ദ്ര നേതൃത്വം വിളിപ്പിച്ചതെന്ന് സൂചന

ബി.ജെ.പി കേരള ഘടകത്തിനകത്തെ വിഭാഗീയത രൂക്ഷമാവുമ്പോള്‍ സംസ്ഥാന അധ്യക്ഷന്‍ കെ. സുരേന്ദ്രന്‍ ഡല്‍ഹിയിലെത്തി. നേതൃത്വത്തിനെതിരെ നേതാക്കള്‍ തന്നെ തിരിഞ്ഞതിനെ കുറിച്ച് ആന്വേഷിക്കാന്‍ കേന്ദ്രം നേതൃത്വം വിളിപ്പിച്ചെതെന്നാണ് സൂചന. സുരേന്ദ്രനെതിരെ സംസ്ഥാന വൈസ് പ്രസിഡന്റ് ശോഭ സുരേന്ദ്രന്‍ രണ്ട് തവണ കേന്ദ്ര നേതൃത്വത്തിന് കത്തയച്ചിരുന്നു. എം. വേലായുധന്‍, കെ.പി. ശ്രീശന്‍ അടക്കമുള്ള മുതിര്‍ന്ന നേതാക്കളും സംസ്ഥാന നേതൃത്വത്തെ പരസ്യമായി വിമര്‍ശിച്ചിരുന്നു.
ഇതിന് പിന്നാലെയാണ് സുരേന്ദ്രന്റെ ഡല്‍ഹി സന്ദര്‍ശം. എന്നാല്‍ അസ്വാഭാവികമായൊന്നുമില്ലെന്നും സാധാരണ സന്ദര്‍ശനമാണെന്നാണ് കെ. സുരേന്ദ്രന്‍ പറഞ്ഞത്. തന്നെ വിളിപ്പിച്ചതല്ലെന്നും തദ്ദേശതെരഞ്ഞെടുപ്പ് അടക്കം ചര്‍ച്ച ചെയ്യാനാണ് എത്തിയതെന്നും സുരേന്ദ്രന്‍ വിശദീകരിച്ചു. അതേസമയം ബിജെപിയിലെ ഗ്രൂപ്പ് തര്‍ക്കം പരസ്യമായ സാഹചര്യത്തില്‍ കഴിഞ്ഞ ദിവസം സുരേന്ദ്രനെ വിളിച്ച് വരുത്തി ആര്‍എസ്എസ് താക്കീത് നല്‍കിയിരുന്നു.