പിന്‍മാറ്റത്തിലും കരുതലോടെ ഇന്ത്യ

അതിര്‍ത്തിയിലെ സംഘര്‍ഷം പരിഹരിക്കാന്‍ ചൈന സന്നദ്ധത അറിയിച്ചെങ്കിലും ജാഗ്രതയില്‍ ഇന്ത്യന്‍ സേന. പാംഗോങ് തടാകത്തിന്റെ വടക്കന്‍ തീരത്തുള്ള എട്ടാം മലനിരയിലേക്കു (ഫിംഗര്‍ 8) പിന്മാറാന്‍ ചൈന മുന്നോട്ടുവച്ച നിബന്ധനയെ ഇന്ത്യ സംശയത്തോടെയാണു കാണുന്നത്. എട്ടാം മലനിര വരെ ഇന്ത്യയുടെ പട്രോളിങ് പാടില്ലെന്നാണു ചൈനയുടെ നിലപാട്.

കഴിഞ്ഞ ഏപ്രിലില്‍ സംഘര്‍ഷം ആരംഭിക്കുന്നതിനു മുന്‍പ് എട്ടാം മലനിര വരെ ഇന്ത്യ പട്രോളിങ് നടത്തിയിരുന്നു. എട്ടാം മലനിര വരെയുള്ള പട്രോളിങ് അവകാശം വിട്ടുകൊടുക്കില്ലെന്നും സേനാ വൃത്തങ്ങള്‍ പറഞ്ഞു.

വരുംദിവസങ്ങളില്‍ ഉന്നത സേനാതലത്തില്‍ നടക്കുന്ന ഒന്‍പതാം ചര്‍ച്ചയില്‍ പിന്മാറ്റം സംബന്ധിച്ച വ്യക്തമായ ഉറപ്പ് ചൈനയില്‍നിന്ന് ഇന്ത്യ തേടും.