ബിഹാറിലും പതിവുതെറ്റിക്കാതെ കോൺഗ്രസ്‌

ബിഹാറിലും പതിവുപോലെ കോൺഗ്രസ്‌ എംഎൽഎമാർ സ്ഥാനമാനങ്ങൾ ലക്ഷ്യമിട്ട്‌ എൻഡിഎയിലേക്ക്‌ കൂറുമാറുന്നു. മറുകണ്ടം ചാടുമെന്ന്‌ സംശയിക്കുന്ന ഒമ്പത്‌ എംഎൽഎമാരുടെ പട്ടിക കോൺഗ്രസ് ‌ബിഹാർ ഘടകം ഹൈക്കമാൻഡിന്‌ കൈമാറി. ഇവരെ നിരീക്ഷിക്കാൻ കേന്ദ്രനേതൃത്വം  നിർദേശിച്ചു‌.

കോൺഗ്രസ്‌ ടിക്കറ്റിൽ മത്സരിച്ച 70‌ പേരെയും തെരഞ്ഞെടുപ്പു ഫലം വരുംമുമ്പേ പട്‌നയിലെ ഹോട്ടലിലേക്ക്‌ മാറ്റിയിരുന്നു. 70ൽ 51 ഉം തോറ്റതിനാൽ ശേഷിച്ചവരാണ്‌ നിരീക്ഷണത്തിൽ. കോൺഗ്രസിന്‌ കൂടുതൽ സീറ്റ്‌ നൽകിയതാണ്‌ മഹാസഖ്യത്തിന്‌ ഭരണം നഷ്ടമാക്കിയതെന്ന വിലയിരുത്തലിനിടെയാണ്‌ ജയിച്ചവർതന്നെ കൂറുമാറാൻ ഒരുങ്ങുന്നത്‌. കോൺഗ്രസിന്റെ മോശംപ്രകടനമാണ്‌ മഹാസഖ്യത്തെ തോൽപ്പിച്ചതെന്ന്‌ മുതിർന്ന കോൺഗ്രസ്‌ നേതാക്കളും തുറന്നുപറയുന്നു.  
സംഘടനാശേഷിയുള്ള മധ്യപ്രദേശ്‌, ഗുജറാത്ത്‌, കർണാടകം, ഗോവ എന്നിവിടങ്ങളിൽപ്പോലും കോൺഗ്രസ്‌ എംഎൽഎമാർ കൂറുമാറുമ്പോൾ സംഘടന ദുർബലമായ ബിഹാറിൽ എന്തും സംഭവിക്കാമെന്ന്‌‌ പ്രാദേശിക നേതാക്കൾ  പറഞ്ഞു.