വോട്ടർ പട്ടികയിൽ പേരുണ്ടോ എന്ന് മൊബൈൽ ഫോണിലൂടെ അറിയാം

തിരുവനന്തപുരം: വോട്ടർ പട്ടികയിൽ പേരുണ്ടോ എന്ന് മൊബൈൽ ഫോണിലൂടെ അറിയാനാകും. www.lsgelection.kerala.gov.in എന്ന വെബ്സൈറ്റിൽ വോട്ടറെ തിരയുക എന്ന ഭാഗത്തു ക്ലിക്ക് ചെയ്തശേഷം ജില്ലയും വോട്ടർ തിരിച്ചറിയൽ കാർഡ് നമ്പറും തുടർന്ന് ക്യാപ്ചകോഡും എന്‍റർ ചെയ്താൽ പട്ടികയിൽ പേരുണ്ടോ എന്ന് അറിയാനാകും. വോട്ടർ ഐഡി നമ്പർ അറിയില്ലെങ്കിൽ വെബ്സൈറ്റിലെ വോട്ടർപട്ടിക എന്ന ഭാഗത്ത് ക്ലിക്ക് ചെയ്ത് പട്ടികയിൽ നിന്നും പേരു കണ്ടെത്താം. 

ഇവിടെ ജില്ല, തദ്ദേശ സ്ഥാപനം, വാർഡ്, പോളിങ് സ്റ്റേഷൻ എന്നിവയും ക്യാപ്ച കോഡും എന്‍റർ ചെയ്താൽ ഇംഗ്ലീഷിലും മലയാളത്തിലും വോട്ടർ പട്ടിക പരിശോധിക്കാൻ അവസരമുണ്ട്. പോളിങ് സ്റ്റേഷൻ നിശ്ചയമില്ലെങ്കിൽ വാർഡിലെ മുഴുവൻ പോളിങ് സ്റ്റേഷനുകളിലെയും പട്ടിക പരിശോധിക്കേണ്ടി വരും. 

പട്ടികയിൽ പേരു ചേർക്കാനോ തിരുത്തൽ വരുത്താനോ ഈ തെരഞ്ഞെടുപ്പിന് മുമ്പ് ഇനി അവസരമില്ല. സമ്മതിദായക പട്ടികയിൽ പേർ ഉൾപ്പെട്ടിട്ടുണ്ടോ എന്ന് എസ്എംഎസ് മുഖാന്തിരവും അറിയാവുന്നതാണ്. അതിനായി (ECIതാങ്കളുടെ വോട്ടർ ഐഡികാർഡ് നമ്പർ) എന്ന് ടൈപ്പ് ചെയ്ത് 1950 എന്ന നമ്പരിലേയ്ക്ക് എസ്എംഎസ് അയക്കേണ്ടതാണ്.