പോയത് കോളജിലേക്കെന്ന് പറഞ്ഞ്; മരണക്കയത്തിലും ഒരുമിച്ച് ഉറ്റസുഹൃത്തുക്കള്‍

അടുത്ത സ്‌നേഹിതരായ പെണ്‍കുട്ടികളെ മരണത്തിനും വേര്‍പെടുത്താന്‍ കഴിഞ്ഞില്ല. മൂന്നു ദിവസം മുന്‍പു കാണാതായ ആയൂര്‍ സ്വദേശിനികളായ പെണ്‍കുട്ടികളുടെ മൃതദേഹം വൈക്കത്തിനു സമീപത്തെ കായലില്‍ നിന്നുമാണ് കണ്ടെത്തിയത്. ഉറ്റ സ്‌നേഹിതരായ ഇരുവരും മരണത്തിലേക്കുള്ള യാത്രയിലും ഒന്നിച്ചായിരുന്നു. ആയൂര്‍ കീഴാറ്റൂര്‍ അഞ്ജുഭവനില്‍ അശോകന്റെ മകള്‍ ആര്യാ ജി.അശോക് (21), ഇടയം അനിവിലാസം വീട്ടില്‍ അനി ശിവദാസിന്റെ മകള്‍ അമൃത അനി (21) എന്നിവരുടെ മൃതദേഹങ്ങളാണു കണ്ടെത്തിയത്. അഞ്ചലിലെ സ്വകാര്യ കോളജിലെ വിദ്യാര്‍ഥികളായ ഇരുവരും ബിഎ ഹിസ്റ്ററി പഠനം പൂര്‍ത്തിയാക്കിയിരുന്നു. ഒരേ ക്ലാസില്‍ പഠിച്ചിരുന്ന ഇരുവരും ക്ലാസിലും പുറത്തുമെല്ലാം ഒന്നിച്ചായിരുന്നു യാത്ര. 13 നു രാവിലെ 10 ന് ഡിഗ്രി സര്‍ട്ടിഫിക്കറ്റ് വാങ്ങുന്നതിനും ആധാര്‍ കാര്‍ഡ് ശരിയാക്കുന്നതിനും പോകുന്നതായി പറഞ്ഞാണു വീട്ടില്‍ നിന്നും ഇറങ്ങിയത്. ഉച്ചയ്ക്കു 12നു ആര്യയുടെ മൊബൈല്‍ ഫോണില്‍ വിളിച്ചു വീട്ടുകാര്‍ സംസാരിച്ചിരുന്നു. ഇരുവരും വീട്ടില്‍ എത്താഞ്ഞതിനെ തുടര്‍ന്നു വൈകിട്ടു വീണ്ടും വിളിച്ചപ്പോള്‍ ഫോണ്‍ സ്വിച്ച് ഓഫ് ചെയ്തിരിക്കുകയാണെന്നു കണ്ടെത്തി. ഇതേ തുടര്‍ന്നു ഇവരെ കാണാനില്ലെന്നറിയിച്ച് ഇവരുടെ വീട്ടുകാര്‍ അഞ്ചല്‍, ചടയമംഗലം പൊലീസുകളില്‍ പരാതി നല്‍കിയിരുന്നു.