കൊവിഡ്: കേന്ദ്രവും സംസ്ഥാനങ്ങളും റിപ്പോർട്ട് നൽകണമെന്ന് സുപ്രീം കോടതി

കൊവിഡ് കേസുകൾ വ്യാപിക്കുന്നതിൽ ആശങ്ക പ്രകടിപ്പിച്ച സുപ്രീം കോടതി ഗുജറാത്ത്, ഡൽഹി സംസ്ഥാന സർക്കാരുകളെ നിശിതമായി വിമർശിച്ചു. എല്ലാ സംസ്ഥാന സർക്കാരുകളും കേന്ദ്ര സർക്കാരും രണ്ടു ദിവസത്തിനകം തത് സ്ഥിതി റിപ്പോർട്ട് സമർപ്പിക്കണമെന്നും കോടതി നിർദേശിച്ചു. കൊവിഡ് സാഹചര്യം നേരിടാൻ എന്തൊക്കെ നടപടികൾ സ്വീകരിച്ചുവെന്ന് അതിൽ വിശദീകരിക്കണമെന്ന് കോടതി ആവശ്യപ്പെട്ടിട്ടുണ്ട്.

ഡൽഹിക്കും മഹാരാഷ്ട്രയ്ക്കും പിന്നാലെ ഗുജറാത്തിലെ സ്ഥിതിഗതികളും വഷളാവുകയാണെന്ന് കോടതി ചൂണ്ടിക്കാട്ടി. അവിടെ കാര്യങ്ങൾ പിടിവിട്ടുപോവുകയാണ്. ദേശീയ തലസ്ഥാനത്തെ സാഹചര്യം തീർത്തും മോശമായിരിക്കുന്നു. എന്തൊക്കെ നടപടികൾ സ്വീകരിച്ചുവെന്ന് സംസ്ഥാന സർക്കാർ അറിയിക്കണം. എല്ലാ സംസ്ഥാനങ്ങളും കേന്ദ്ര സർക്കാരും കൊവിഡ് മഹാമാരി നേരിടാനുള്ള ഉചിതമായ നടപടികൾ ഊർജിതമായി കൈക്കൊള്ളണം- കോടതി നിർദേശിച്ചു. ജസ്റ്റിസുമാരായ അശോക് ഭൂഷൻ, ആർ.എസ്. റെഡ്ഡി, എം.ആർ. ഷാ എന്നിവർ അടങ്ങിയ ബെഞ്ചിന്‍റേതാണ് ഉത്തരവ്.

രാജ്യത്തെ സാഹചര്യങ്ങൾ മെച്ചമല്ലെന്നും ഡിസംബറിൽ കൂടുതൽ വഷളാവുമെന്നുമാണ് കോടതിക്ക് വിവരം ലഭിച്ചിരിക്കുന്നതെന്ന് ബെഞ്ച് ചൂണ്ടിക്കാട്ടി. ഇനിയെന്തൊക്കെ നടപടികളാണു സ്വീകരിക്കാൻ പോകുന്നത്, കേന്ദ്രത്തിൽ നിന്ന് എന്തു സഹായമാണു വേണ്ടത് തുടങ്ങിയ കാര്യങ്ങൾ സംസ്ഥാനങ്ങളുടെ തത് സ്ഥിതി റിപ്പോർട്ടിൽ ഉണ്ടാവണമെന്നും കോടതി നിർദേശിച്ചിട്ടുണ്ട്.