ഗുരുവായൂര്‍ ക്ഷേത്രദര്‍ശനത്തിന് കൂടുതല്‍ ഇളവുകള്‍ നല്‍കാന്‍ തീരുമാനം

തൃശൂര്‍: ഗുരുവായൂര്‍ ക്ഷേത്രദര്‍ശനത്തിന് കോവിഡ് നിയന്ത്രണങ്ങളില്‍ കൂടുതല്‍ ഇളവുകള്‍ നല്‍കാന്‍ ദേവസ്വം ഭരണസമിതി തീരുമാനിച്ചു.

ഡിസംബര്‍ ഒന്ന് മുതല്‍ നാലമ്പലത്തിനകത്തേക്ക് പ്രവേശനം ഉള്‍പ്പെടെയുള്ള ഇളവുകള്‍ നിലവില്‍ വരും. എട്ട് മാസങ്ങള്‍ക്ക് ശേഷമാണ് നാലമ്പല ദര്‍ശനത്തിന് അനുമതി ലഭിക്കുന്നത്. വെര്‍ച്വല്‍ ക്യൂ വഴി പ്രതിദിനം 4000 പേര്‍ക്ക് ദര്‍ശനം നടത്താം.

നിലവില്‍ 1500 പേര്‍ക്കാണ് അനുമതിയുള്ളത്. ഇനിമുതല്‍ ദിവസവും 100 വിവാഹങ്ങള്‍ നടത്താനാകും. നിലവില്‍ 60 വിവാങ്ങള്‍ക്കാണ് അനുമതിയുള്ളത്. തുലാഭാരം വഴിപാടിനും കൂടുതല്‍ സൗകര്യങ്ങള്‍ ഉണ്ടാകും.

തുലാഭാരത്തിന് വരുന്നവരെ ഭഗവതിക്ഷേത്രം വഴി പ്രവേശിപ്പിക്കും. തുലാഭാരത്തിന് ശേഷം നിയന്ത്രിതമായ രീതിയില്‍ ദര്‍ശനസൗകര്യവും നല്‍കും. കോവിഡ് മാനദണ്ഡങ്ങള്‍ കര്‍ശനമായി പാലിച്ചായിരിക്കും ഇളവുകള്‍ നടപ്പിലാക്കുക.

ദര്‍ശനത്തിനെത്തുന്ന ഭക്തര്‍ കിഴക്കേ ഗോപുരം വഴി ചുറ്റമ്പലത്തില്‍ പ്രവേശിച്ച് അയ്യപ്പദര്‍ശനം നടത്തി വിളക്ക് മാഠത്തിനിരികിലുള്ള വരി വഴി നാലമ്പലത്തില്‍ പ്രവേശിച്ച് നമസ്‌കാരമണ്ഡപത്തിന് മുന്നില്‍ വന്ന് ഗുരുവായൂരപ്പനേയും ഗണപതിയേയും തൊഴുത് വടക്കേവാതില്‍ വഴി പുറത്ത് കടക്കുന്ന രീതിയിലാണ് ദര്‍ശനം ക്രമീകരിച്ചിരിക്കുന്നത്.

ശ്രീകോവിലില്‍ നെയ് വിളക്ക് ശീട്ടാക്കുന്നവര്‍ക്ക് നേരിട്ട് നാലമ്പലത്തിനകത്തേക്ക് പ്രവേശനം അനുവദിക്കും. പ്രാദേശിയര്‍, ദേവസ്വം ജീവനക്കാര്‍, പെന്‍ഷന്‍കാര്‍, ഇവരുടെ കുടുംബാംഗങ്ങള്‍ എന്നിവര്‍ക്ക് രാവിലെ 5.30 മുതല്‍ 6.30 വരെയാണ് ദര്‍ശനത്തിന് സമയക്രമം ഏര്‍പ്പെടുത്തിയിരിക്കുന്നത്.

വെര്‍ച്വല്‍ ക്യൂ വഴി രാവിലെ 4.30 മുതല്‍ 5.30 വരേയും 9.30 മുതല്‍ 1.30 വരേയും വൈകിട്ട് അഞ്ച് മുതല്‍ 6.30 വരേയും രാത്രി 7.30 മുതല്‍ 8.30 വരേയുമാണ് ദര്‍ശനം നടത്താനാകുക.

ഉച്ചയ്ക്ക് ഒന്ന് മുതല്‍ 1.30 വരെ ദേവസ്വം ജീവനക്കാര്‍ക്ക് മാത്രമായും ദര്‍ശനം ക്രമീകരിക്കും.  കിഴക്കേനടയില്‍ വഴിപാട് ശീട്ടാക്കാന്‍ പ്രത്യേക കൗണ്ടറും ആരംഭിക്കും.