കര്‍ഷക സമരം ചര്‍ച്ചയ്ക്ക് ഒരുങ്ങി സര്‍ക്കാര്‍

കേന്ദ്ര സര്‍ക്കാരിന്റെ കാര്‍ഷിക ബില്ലിനെതിരെയുള്ള കര്‍ഷകരുടെ സമരം അഞ്ചാം ദിവസം കടക്കുമ്പോള്‍ ചര്‍ച്ചയ്ക്ക് ഒരുങ്ങി കേന്ദ്ര സര്‍ക്കാര്‍. ഇന്ന് വൈകിട്ട് മൂന്ന് മണിയോടെ കര്‍ഷകരുമായി ചര്‍ച്ച നടത്തുമെന്ന് കേന്ദ്ര കൃഷി മന്ത്രി നരേന്ദ്ര തോമര്‍ അറിയിച്ചു. ഡല്‍ഹിയിലെ ശീത കാലാവസ്ഥയും വര്‍ദ്ധിച്ചു വരുന്ന കൊവിഡ് കേസുകളും കണക്കിലെടുത്താണ് അടിയന്തരമായി ചര്‍ച്ചയ്ക്ക് തയ്യാറാകാന്‍ കേന്ദ്ര സര്‍ക്കാര്‍ തീരുമാനിച്ചത്.

ഇതിനിടെ പ്രക്ഷോഭം 5 ദിവസം പിന്നിടുമ്പോള്‍ ഡല്‍ഹി ലക്ഷ്യമിട്ട് പഞ്ചാബ്, ഹരിയാന, യുപി എന്നീ സംസ്ഥാനങ്ങളില്‍നിന്നു കൂടുതല്‍ കര്‍ഷകര്‍ എത്തുന്നു. വിവാദ നിയമങ്ങള്‍ പിന്‍വലിച്ചില്ലെങ്കില്‍ ഡല്‍ഹിയിലേക്കുള്ള 5 അതിര്‍ത്തികളും ഉപരോധിക്കുമെന്നു കര്‍ഷക സംഘടനകള്‍ വ്യക്തമാക്കി. കര്‍ഷകരുടെ ആവശ്യങ്ങള്‍ 2 ദിവസത്തിനകം അംഗീകരിച്ചില്ലെങ്കില്‍ ദേശീയ തലസ്ഥാന മേഖലയില്‍ അനിശ്ചിതകാല പണിമുടക്ക് ആരംഭിക്കുമെന്ന് ടാക്‌സി, ഓട്ടോ, ട്രക്ക് യൂണിയനുകള്‍ മുന്നറിയിപ്പു നല്‍കി.

ഉപരോധവും യൂണിയനുകളുടെ സമരവും മൂലം ദേശീയപാതകള്‍ തടസ്സപ്പെട്ടാല്‍ ദക്ഷിണേന്ത്യന്‍ സംസ്ഥാനങ്ങളിലേക്കുള്ള ചരക്കുനീക്കം മുടങ്ങും. ജമ്മു കശ്മീര്‍, ഹിമാചല്‍പ്രദേശ്, പഞ്ചാബ്, ഉത്തരാഖണ്ഡ് എന്നിവിടങ്ങളില്‍ നിന്ന് ഭക്ഷ്യപദാര്‍ഥങ്ങളും മറ്റുമായി ആയിരക്കണക്കിനു ട്രക്കുകളാണ് ഇതുവഴി ദിവസവും കടന്നുപോകുന്നത്.

ഗുരു നാനാക്കിന്റെ ജന്മദിനാഘോഷങ്ങളോട് അനുബന്ധിച്ച് എത്തിയ കര്‍ഷകര്‍ അമൃതസറിലേക്ക് മടങ്ങി പോകുമ്പോള്‍ ഡല്‍ഹിയിലേക്കുള്ള അഞ്ച് പ്രവേശന കവാടങ്ങള്‍ അടച്ചിടുമെന്ന് കര്‍ഷക സംഘടനകള്‍ ഭീഷണി ഉയര്‍ത്തിയിരുന്നു. ഇതിന് പിന്നാലെ ഉന്നതതല യോഗം ചേര്‍ന്ന ബി.ജെ.പി കര്‍ഷകരെ ചര്‍ച്ചയ്ക്ക് വിളിക്കാന്‍ തീരുമാനിക്കുകയായിരുന്നു.ബി.ജെ.പി അദ്ധ്യക്ഷന്‍ ജെ.പി.നദ്ദയുടെ വസതിയിലായിരുന്നു യോഗം ചേര്‍ന്നിരുന്നത്. ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിംഗ്, കൃഷി വകുപ്പ് മന്ത്രി നരേന്ദ്ര സിംഗ് തോമര്‍ എന്നിവരാണ് യോഗത്തില്‍ പങ്കെടുത്തിരുന്നത്. നേരത്തെ അമിത് ഷാ ചര്‍ച്ചയ്ക്കായി മുന്നോട്ട് വച്ച നിര്‍ദേശങ്ങള്‍ കര്‍ഷക സംഘടനകള്‍ തള്ളിയിരുന്നു