സി.എം രവീന്ദ്രന് വീണ്ടും ഇ.ഡി നോട്ടീസ് ; ഡിസംബര്‍ പത്തിന് ഹാജരാവണമെന്നാണ് നിര്‍ദ്ദേശം

സി.എം രവീന്ദ്രന് ഇ.ഡി നോട്ടീസ്. ഡിസംബര്‍ 10 ന് ചോദ്യംചെയ്യലിന് ഹാജരാകാനാണ് നിര്‍ദ്ദേശം.മൂന്നാം തവണയാണ് ചോദ്യംചെയ്യലിനായി രവീന്ദ്രന് ഇ.ഡി നോട്ടീസ് നല്‍കുന്നത്. മുന്‍പ് രണ്ട് തവണ ചോദ്യംചെയ്യലിന് ഇഡി നോട്ടിസ് നല്‍കിയിട്ടും രവീന്ദ്രന്‍ ഹാജരായിരുന്നില്ല. മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയായിരുന്ന എം.ശിവശങ്കറിന് ഒപ്പമിരുത്തി ചോദ്യം ചെയ്യാന്‍ കഴിഞ്ഞമാസം 6ന് ഹാജരാകാനാണ് ആദ്യം ആവശ്യപ്പെട്ടത്.
എന്നാല്‍ തലേ ദിവസം കൊവിഡ് സ്ഥിരീകരിച്ച് രവീന്ദ്രന്‍ ചികിത്സ തേടി. 10 ദിവസം കഴിഞ്ഞ് നെഗറ്റീവായതോടെ വീണ്ടും ഹാജരാകാന്‍ നോട്ടിസ് നല്‍കി. എന്നാല്‍ കൊവിഡാനന്തര ചികിത്സകള്‍ക്കെന്ന പേരില്‍ രവീന്ദ്രന്‍ മെഡിക്കല്‍ കോളജില്‍ വീണ്ടും ചികിത്സ തേടുകയായിരുന്നു.
സ്വര്‍ണക്കടത്ത് കേസ് പ്രതി സ്വപ്ന സുരേഷിന്റെയും മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിന്റെയും അറസ്റ്റിലായ മറ്റു രണ്ടു പേരുടെയും മൊഴികളില്‍നിന്നു രവീന്ദ്രന്റെ ചില ഇടപാടുകളെക്കുറിച്ചു കൃത്യമായ വിവരം ലഭിച്ചിരുന്നു. ഇതിന്റെ അടിസ്ഥാനത്തിലാണ് ചോദ്യംചെയ്യലിനായി ഇഡി നോട്ടീസ് നല്‍കിയത്.