കര്‍ഷക സമരത്തിന് പിന്തുണ; ബെന്‍സ് ഒഴിവാക്കി നവവരന്‍ വിവാഹവേദിയിലെത്തിയത് ട്രാക്ടറില്‍

കര്‍ഷക സമരത്തിന് പിന്തുണ നല്‍കാന്‍ വിവാഹ ദിവസം വ്യത്യസ്തമാക്കിയിരിക്കുകയാണ് ഹരിയാനയിലെ കര്‍ണാല്‍ സ്വദേശി സുമിത് ദുല്‍.

വിവാഹദിവസം വധൂഗൃഹത്തില്‍ സുമിത് എത്തിയത് ട്രാക്ടറിലാണ്. മെഴ്‌സിഡസ് ബെന്‍സ് ഓടിച്ച് എത്തേണ്ടിയിരുന്ന വരനാണ് കര്‍ഷകരുടെ സമരത്തിന് പിന്തുണ നല്‍കാന്‍ ട്രാക്ടര്‍ തെരഞ്ഞെടുത്തത്.

താന്‍ കര്‍ഷക കുടുംബത്തിലെ അംഗമാണെന്നും കര്‍ഷകരുടെ സമരത്തിന് പിന്തുണ നല്‍കാനാണ് ബെന്‍സിന് പകരം ട്രാക്ടര്‍ തെരഞ്ഞെടുത്തതെന്നും സുമിത് ദുല്‍ പിന്നീട് പറഞ്ഞു.

'ഞങ്ങള്‍ ഇപ്പോള്‍ ജീവിക്കുന്ന പ്രദേശങ്ങള്‍ വ്യത്യസ്തമായിരിക്കാം. എന്നാല്‍ ഞങ്ങളുടെ വേര് കൃഷിയിലാണ്. കര്‍ഷകര്‍ക്കായാരിക്കണം മുന്‍ഗണന. അവരുടെ സമരത്തിന് പൊതു പിന്തുണയുണ്ടെന്ന് അറിയാക്കാനുള്ള സന്ദേശമാണിത്'.

വധുവിന്റെ വീട്ടിലേക്ക് പുറപ്പെടാന്‍ അലങ്കരിച്ച ബെന്‍സ് കാര്‍ ഒരുക്കി നിര്‍ത്തിയെങ്കിലും താന്‍ ട്രാക്ടര്‍ ഓടിച്ചാണ് പോകുന്നത് എന്ന് സുമിത് അറിയിക്കുകയായിരുന്നുവെന്ന് അദ്ദേഹത്തിന്റെ അമ്മാവന്‍ സുരീന്ദര്‍ നര്‍വാള്‍ പറഞ്ഞു. കാര്‍ഷകര്‍ക്കുള്ള പിന്തുണ അറിയിക്കാനുള്ള സുമിതിന്റെ ചെറിയ ശ്രമമായിരുന്നു ഇതെന്നും അമ്മാവന്‍.

അതേസമയം, കര്‍ഷകര്‍ക്കുള്ള പിന്തുണ അറിയിക്കാന്‍ നവ വധൂവരന്മാര്‍ ഉടന്‍ തന്നെ ഡല്‍ഹി അതിര്‍ത്തിയിലേക്ക് പോകാനിരിക്കുകയാണ്. ഭാര്യയ്‌ക്കൊപ്പം കര്‍ഷക സമരത്തില്‍ നേരിട്ടെത്തി പിന്തുണ നല്‍കാനാണ് സുമിത്തിന്റെ തീരുമാനം.