രാജന്റെ മക്കള്‍ക്ക് സര്‍ക്കാര്‍ വീട് വച്ച് നല്‍കും, സംരക്ഷണം ഏറ്റെടുക്കും

നെയ്യാറ്റിന്‍കരയില്‍ തര്‍ക്കഭൂമി ഒഴിപ്പിക്കുന്നതിനിടെ മരിച്ച രാജന്റെയും അമ്പിളിയുടെയും രണ്ട് മക്കളുടെ സംരക്ഷണം സര്‍ക്കാര്‍ ഏറ്റെടുക്കും. കുട്ടികള്‍ക്ക് വീടും സ്ഥലവും നല്‍കും. തീയാളി മരിച്ച ഇരുവരുടെയും അനാഥരായ മക്കളുടെ വാക്കുകള്‍ കേരളം വേദനയോടെയാണ് കേട്ടുനിന്നത്.
രണ്ട് കുട്ടികളുടെയും സംരക്ഷണം ഏറ്റെടുക്കുമെന്ന് മുഖ്യമന്ത്രിയുടെ ഓഫീസാണ് അറിയിച്ചത്. വിഷയം വലിയ വിവാദമായതിനെത്തുടര്‍ന്ന് മുഖ്യമന്ത്രി അടിയന്തരനിര്‍ദേശം നല്‍കുകയായിരുന്നു. ഇന്ന് തൃശ്ശൂരിലും എറണാകുളത്തുമായി കേരളപര്യടനപരിപാടിയിലാണ് മുഖ്യമന്ത്രി.
''ഞങ്ങള്‍ക്ക് അച്ഛന്‍ പോയി. അമ്മയും പോയാല്‍ പിന്നെ ഈ തെരുവില് നിന്ന് നീറി നീറി മരിക്കത്തേയുള്ളൂ, ഞങ്ങള്‍ക്കിനി ആരുണ്ട്?'', അച്ഛന്റെ മൃതദേഹമുള്ള മോര്‍ച്ചറിക്ക് മുന്നില്‍ നിന്ന് രഞ്ജിത്തും രാഹുലും പൊട്ടിക്കരഞ്ഞുകൊണ്ട് പറഞ്ഞത് നീറുന്ന ദൃശ്യമായിരുന്നു. തര്‍ക്കഭൂമി ഒഴിപ്പിക്കുന്ന നടപടികള്‍ക്കിടെയാണ് നെയ്യാറ്റിന്‍കര സ്വദേശികളായ രാജനും ഭാര്യ അമ്പിളിയും മരിച്ചത്. പെട്രോളൊഴിച്ച് നിന്ന രാജന്റെ കയ്യിലുണ്ടായിരുന്ന ലൈറ്ററില്‍ നിന്ന് പൊലീസുമായുണ്ടായ തര്‍ക്കത്തിനിടെ തീയാളുകയായിരുന്നു.
എന്നാല്‍ മൂന്ന് സെന്റ് ഭൂമി ഒഴിപ്പിക്കുന്നത് പോലെയുള്ള ഇത്തരം ചെറിയ കേസുകള്‍ സംയമനത്തോടെയും സഹാനുഭൂതിയോടെയും പൊലീസ് കൈകാര്യം ചെയ്യേണ്ടതായിരുന്നുവെന്ന് പ്രതിപക്ഷനേതാവ് രമേശ് ചെന്നിത്തലയടക്കമുള്ളവര്‍ വ്യക്തമാക്കിയിരുന്നു. കുട്ടികളുടെ സംരക്ഷണം സര്‍ക്കാര്‍ ഏറ്റെടുക്കണമെന്നും ചെന്നിത്തല ആവശ്യപ്പെട്ടു.
അതേസമയം, പൊലീസും വീട് ഒഴിപ്പിക്കാന്‍ ഹര്‍ജി നല്‍കിയ അയല്‍ക്കാരും തമ്മില്‍ ഒത്തുകളിച്ചുവെന്നാണ് രാജന്റെ മക്കള്‍ ആരോപിക്കുന്നത്. ഹൈക്കോടതിയില്‍ നിന്ന് സ്റ്റേ ഓര്‍ഡര്‍ മണിക്കൂറുകള്‍ക്കകം വരുമെന്നറിഞ്ഞ്, പൊലീസ് ഒഴിപ്പിക്കാന്‍ നോക്കിയെന്ന ഗുരുതരമായ ആരോപണം രാജന്റെ മക്കള്‍ ഉന്നയിച്ചു. ഈ സാഹചര്യത്തില്‍ ഡിജിപി എന്താണ് സംഭവിച്ചതെന്നതില്‍ റൂറല്‍ എസ്പിയോട് അന്വേഷിച്ച് വിശദമായ റിപ്പോര്‍ട്ട് നല്‍കാന്‍ ആവശ്യപ്പെട്ടിട്ടുമുണ്ട്.