തിരുവനന്തപുരം മേയര്‍ക്ക് ഔദ്യോഗിക വസതി ഒരുങ്ങുന്നു

എട്ടരകോടി കെട്ടിടത്തില്‍ മറ്റ് മേയര്‍മാര്‍ക്കും സ്വാഗതം

അസൗകര്യങ്ങള്‍ ഏറെയെുള്ള കുഞ്ഞു വാടക വീട്ടിലാണ് താമസിക്കുന്നതെങ്കിലും തിരുവനന്തപുരം മേയറും വിദ്യാര്‍ത്ഥിനിയുമായ ആര്യ ഒരിക്കല്‍ പോലും തന്റെ പ്രാരാബ്ദത്തെകുറിച്ച് പങ്കുവെച്ചിട്ടില്ല. എന്നാല്‍ മേയറായതോടെ ആര്യയെ കാണാന്‍ വീട്ടിലെത്തുന്നവര്‍ക്ക് വാഹനം പോലും കടന്നു ചെല്ലാന്‍ കഴിയാത്തത് വലിയ ബുദ്ധിമുട്ടായിരിക്കുകയാണ്. ഇക്കാര്യം സ്ഥലത്തെ നേതാക്കള്‍ പാര്‍ട്ടിയെ അറിയിച്ചതോടെ നേതൃത്വം കാര്യമായി തന്നെ വിഷയം ഏറ്റെടുത്തുവെന്നാണ് സൂചന.
മേയറാണെങ്കിലും താന്‍ ഈ വീട്ടില്‍ തന്നെ തുടരുമെന്നും ഒരു കൂടംമാറ്റം ഇല്ലെന്നുമാണ് ആര്യയുടെ നിലപാട്. എന്നാല്‍ മേയര്‍ക്ക് ഔദ്യോഗിക വസതി വേണമെന്ന ആവശ്യം പാര്‍ട്ടിയില്‍ ശക്തമായിരിക്കുകയാണ്. മുമ്പ് വി ശിവന്‍കുട്ടി മേയര്‍ ആയപ്പോഴും പാര്‍ട്ടിയില്‍ ഇതേ ചര്‍ച്ച സജീവമായിരുന്നു. അങ്ങനെയാണ് കുന്നംകുഴി വാര്‍ഡില്‍ ബാര്‍ട്ടണ്‍ഹില്ലില്‍ എട്ടരകോടി രൂപ ചെലവില്‍ മേയര്‍ക്ക് ഔദ്യോഗിക വസതി നിര്‍മ്മിക്കാന്‍ ആലോചന തുടങ്ങിയത്. തലസ്ഥാനത്ത് എത്തുന്ന മറ്റുമേയര്‍മാര്‍ക്കും താമസിക്കാന്‍ സൗകര്യമുള്ള മന്ദിരം ഒരുക്കണമെന്നാണ് തീരുമാനം. അതിനാല്‍ തന്നെ നിര്‍മ്മാണ ചെലവ് തുല്യമായി പങ്കിടാന്‍ മറ്റ് കോര്‍പ്പറേഷനുമായി ധാരണയിലെത്തിയെന്നാണ് സൂചന.
ഇത്തരത്തില്‍ മൂന്ന് നില കെട്ടിടം പണിയാന്‍ ബാര്‍ട്ടണ്‍ഹില്ലിലെ അങ്കണവാടി ഇരിക്കുന്ന സ്ഥലമാണ് കണ്ടെത്തിയിരിക്കുന്നത്. അങ്കണവാടി സമീപത്തെ കമ്മ്യൂണിറ്റി ഹാളിലേക്ക് മാറ്റാനും തീരുമാനിച്ചിട്ടുണ്ട്. ഏറ്റവും താഴത്തെ നിലയില്‍ മേയറുടെ ഓഫീസ്, ഓഡിറ്റോറിയം, രണ്ടാമത്തെ നിലയില്‍ മറ്റു കോര്‍പ്പറേഷന്‍ മേയര്‍മാര്‍ വരുമ്പോള്‍ താമസിക്കുന്നതിനുള്ള സൗകര്യം, മൂന്നാം നിലയില്‍ തലസ്ഥാനത്തെ മേയറുടെ വസതി എന്നിങ്ങനെയാണ് പ്ലാന്‍ തയ്യാറാക്കിയത്. എന്നാല്‍ രൂപകല്‍പ്പനയെല്ലാം പൂര്‍ത്തിയായപ്പോള്‍ പ്രദേശവാസികളില്‍ ചിലര്‍ എതിര്‍പ്പുമായി രംഗത്തെത്തിയതോടെ നിര്‍മ്മാണം മുടങ്ങുകയായിരുന്നു. നിലവില്‍ കോഴിക്കോട് മേയര്‍ക്ക് മാത്രമാണ് ഔദ്യോഗിക വസതിയുള്ളത്. ബാര്‍ട്ടണ്‍ ഹില്ലിലെ നാട്ടുകാരെ വിശ്വാസത്തിലെടുത്ത് ഉടന്‍ തന്നെ കോഴിക്കോടിനേത് സമാനമായി ഔദ്യോഗിക മേയര്‍ വസതി നിര്‍മ്മിക്കാനാണ് പാര്‍ട്ടി തീരുമാനം.