കൂടുതല്‍ ഹൈവേകള്‍ ഉപരോധിക്കാനൊരുങ്ങി കര്‍ഷകര്‍

മറ്റന്നാള്‍ ഡല്‍ഹിയിലെ നാല് അതിര്‍ത്തികളിലേക്ക് ട്രാക്ടര്‍ മാര്‍ച്ച്

കൂടുതല്‍ ഹൈവേകള്‍ ഉപരോധിക്കാനൊരുങ്ങി കര്‍ഷകര്‍. പല്‍വാള്‍ മനേസര്‍ ഹൈവേകള്‍ ഉപരോധിക്കാന്‍ തീരുമാനം. ജനുവരി 7 ന് ഡല്‍ഹിയിലെ നാല് അതിര്‍ത്തികളിലേക്ക് ട്രാക്ടര്‍ മാര്‍ച്ച് നടത്തും. നാളെ മുതല്‍ 2 ആഴ്ചത്തേക്ക് ദേശ് ജാഗ്രന്‍ അഭിയാന്‍ തുടങ്ങുമെന്നും കര്‍ഷകര്‍ അറിയിച്ചു. കര്‍ഷകരുമായി കേന്ദ്ര സര്‍ക്കാര്‍ നടത്തിയ ഏഴാമത്തെ ചര്‍ച്ചയും പരാജയപ്പെട്ടതോടെ നാല്പത്തിയൊന്നാം ദിവസവും സമരം തുടരുകയാണ്.
നിയമം പിന്‍വലിക്കില്ലെന്ന് കേന്ദ്ര സര്‍ക്കാരും പിന്‍വലിക്കാതെ സമരം അവസാനിപ്പിക്കില്ലെന്ന് കര്‍ഷകരും നിലപാടുറപ്പിച്ചതോടെ കര്‍ഷക സമരം അനിശ്ചിതമായി തുടരുകയാണ്. തണുപ്പും മഴയും അവഗണിച്ച് നിരവധി പേരാണ് അതിര്‍ത്തികളില്‍ എത്തുന്നത്. സ്ത്രീകളുടെ നേതൃത്വത്തില്‍ ട്രാക്ടര്‍ റാലിയും നടത്താന്‍ കര്‍ഷകര്‍ തീരുമാനിച്ചിട്ടുണ്ട്. അതിനിടെ, കേന്ദ്ര സര്‍ക്കാര്‍ എല്ലാ ദിവസവും കര്‍ഷകരുമായി കൂടിക്കാഴ്ച്ച നടത്തണമെന്ന് രാജസ്ഥാന്‍ മുഖ്യമന്ത്രി അശോക് ഗെഹ്‌ലോട്ട് ആവശ്യപ്പെട്ടു. പ്രതികൂല കാലാവസ്ഥയിലും സമരം ചെയ്യുന്ന കര്‍ഷകരുടെ ആവശ്യം അംഗീകരിക്കണമെന്നാണ് ഗെഹ്‌ലോട്ട് ട്വിറ്ററില്‍ കുറിച്ചത്.