അഭയാക്കേസ് വിധി: നിലപാട് വ്യക്തമാക്കി സിറോ മലബാര്‍ സഭ

സിസ്റ്റര്‍ അഭയാക്കേസ് വിധിയില്‍ നിലപാട് വ്യക്തമാക്കി സിറോ മലബാര്‍ സഭ. കോടതി വിധിയെ അംഗീകരിക്കുന്നുവെങ്കിലും നിരപരാധികള്‍ ശിക്ഷിക്കപ്പെടരുതെന്നാണ് പൊതുനിലപാടെന്ന് സഭാ സിനഡ് വ്യക്തമാക്കി. വിധിയിലെ ഉളളടക്കം സംബന്ധിച്ച് നിയമഞ്ജര്‍ അടക്കം ഉന്നയിച്ച വ്യത്യസ്ത അഭിപ്രായങ്ങള്‍ മേല്‍ക്കേടതിയില്‍ പരിഗണിക്കപ്പെടുമെന്നാണ് കരുതുന്നത്.
അഭയാക്കേസില്‍ വൈദികനേയും കന്യാസ്ത്രീയേയും ജീവപര്യന്തം തടവിന് ശിക്ഷിച്ചതിന് ശേഷം ആദ്യമായി ചേര്‍ന്ന സിനഡ് യോഗത്തിലാണ് സിറോ മലബാര്‍ സഭ നിലപാട് അറിയിച്ചത്. രാജ്യത്തിന്റെ നീതിന്യായ വ്യവസ്ഥയില്‍ വിശ്യാസമുളള സമൂഹം എന്ന നിലയില്‍ വിധിയെ സഭയും അംഗീകരിക്കുന്നു. എന്നാല്‍ ഉത്തരവിന്റെ ഉളളടക്കം സംബന്ധിച്ച് മുന്‍ ന്യായാധിപന്‍മാരും ഫൊറന്‍സിക് വിദഗ്ധരും കുറ്റാന്വേഷകരും പ്രകടിപ്പിച്ച വ്യത്യസ്ഥ അഭിപ്രായങ്ങള്‍ പരിഗണിക്കപ്പെടേണ്ടതാണ്.
നിക്ഷിപ്ത താല്‍പര്യങ്ങളെ പ്രതി നിരപരാധികള്‍ ശിക്ഷിക്കപ്പെടുകയും യഥാര്‍ഥ പ്രതികള്‍ ശിക്ഷിക്കപ്പെടുകയും ചെയ്യുന്ന അവസ്ഥ ഉണ്ടാകരുത്. മേല്‍ക്കോടതികളിലെ അപ്പീലില്‍ നിജസ്ഥിതി കൂടുതല്‍ വ്യക്തമാകുമെന്നാണ് പ്രതീക്ഷിക്കുന്നതെന്നും സിനഡ് വാര്‍ത്താക്കുറിപ്പില്‍ വ്യക്തമാക്കി. എന്നാല്‍ അഭയാക്കേസിന്റെ പേരില്‍ സ്വന്തം അഭിപ്രായങ്ങള്‍ സഭയുടെ അഭിപ്രായങ്ങളായി അവതരിപ്പിക്കുന്നതില്‍ നിന്ന് ഉത്തരവാദിത്വപ്പെട്ടവര്‍ പിന്‍മാറണമെന്നും സിനഡ് ആവശ്യപ്പെട്ടു. പോട്ട ആശ്രമത്തിലെ ഫാദര്‍ മാത്യു നായ്കം പറന്പില്‍ നടത്തിയ പ്രസ്താവന വിവാദമായ പശ്ചാത്തലത്തിലാണിത്.വൈദികന്‍ തന്നെ ഇക്കാര്യത്തില്‍ ക്ഷമ ചോദിച്ചതാണെന്നും അച്ചടക്ക നടപടികളൊന്നും പരിഗണനയിലില്ലെന്നും കെസിബിസിയും സഭാ അധികൃതരും വ്യക്തമാക്കി.