മകളോട് അശ്ലീല വാക്കുപയോഗിച്ചെന്ന് വ്യാജ പരാതി നല്‍കി; ഐജിക്ക് പരാതി നല്‍കി അച്ഛന്‍

കടക്കാവൂര്‍ പോക്‌സോ കേസ് വന്‍ വിവാദമായിരിക്കെ സമാന ആരോപണവുമായി വേറെയും പരാതിക്കാര്‍ രംഗത്ത്. മകളെ ഉപയോഗിച്ച് പോക്‌സോ കേസില്‍ കുടുക്കിയെന്ന് കൊല്ലം സ്വദേശി ഐ.ജി ഹര്‍ഷിത അത്തല്ലൂരിക്ക് പരാതി നല്‍കി. അഭിഭാഷകന്‍ ഇടപെട്ട് ഗൂഢാലോചന നടത്തിയെന്നും, പുനരന്വേഷണം വേണമെന്നും പരാതിയില്‍ ആവശ്യപ്പെടുന്നു. ഇന്നലെയാണ് കൊല്ലം സ്വദേശി ഐജിക്ക് പരാതി നല്‍കിയത്. മകള്‍ക്കെതിരെ അശ്ലീല വാക്കുകള്‍ ഉപയോഗിച്ച് സംസാരിച്ചുവെന്നും ലൈംഗികമായി അധിക്ഷേപിച്ചുവെന്നുമാണ് കേസ്.
മകനെ ലൈംഗികമായി പീഡിപ്പിച്ചുവെന്നാണ് കടയ്ക്കാവൂരിലെ യുവതിക്കെതിരായ പരാതി. ഈ സംഭവത്തില്‍ ഭര്‍ത്താവിന്റെ രണ്ടാം വിവാഹത്തെ എതിര്‍ത്തതോടെയാണ് പോക്‌സോ പരാതി ഉയര്‍ന്നതെന്ന അമ്മയുടെ കുടുംബത്തിന്റെ വാദം ശക്തമാക്കി കൂടുതല്‍ വെളിപ്പെടുത്തലുകള്‍ പുറത്തുവന്നു. യുവതിയുടെ ഭര്‍ത്താവിന് രണ്ടാം വിവാഹത്തിന് അനുമതി നല്‍കിയിട്ടില്ലെന്ന് മഹല്ല് ജമാഅത്ത് വ്യക്തമാക്കി. നിയമപരമായ നടപടിക്രമങ്ങള്‍ പൂര്‍ത്തിയാക്കാതെയായിരുന്നു രണ്ടാം വിവാഹമെന്ന് ഭര്‍ത്താവും സമ്മതിക്കുന്നു.
വിവാഹബന്ധം വേര്‍പെടുത്താതെ ഭര്‍ത്താവ് മറ്റൊരു സ്ത്രീയുമായി ബന്ധം സ്ഥാപിച്ചത് ചോദ്യം ചെയ്തതും പരാതി നല്‍കിയതുമാണ് യുവതിക്കെതിരായ പോക്‌സോ കേസിന് പിന്നിലെന്നാണ് കുടുംബത്തിന്റെ പരാതി. ഇത് ശരിവെക്കുന്നതാണ് ഇയാളുള്‍പ്പെട്ട മഹല്ല് ജമാഅത്തിന്റെ നിലപാട്. രണ്ടാം വിവാഹത്തിന് അനുമതി തേടിയപ്പോള്‍ വിവാഹ മോചനം നേടാതെ അനുമതി നല്‍കാനാവില്ലെന്ന് ഇയാളോട് വ്യക്തമാക്കിയിരുന്നു. രണ്ടാം വിവാഹത്തിന് അനുമതി നല്‍കിയിട്ടുമില്ലെന്ന് കായല്‍വാരം നൂറുല്‍ഹുദാ മുസ്ലിം ജമാ അത്ത് ഭാരവാഹി എംഎ ജബ്ബാര്‍ പറഞ്ഞു.
രണ്ട് തവണ മൊഴി ചൊല്ലുക മാത്രമാണ് ചെയ്തതെന്നും, നിയമമപരമായ നടപടിക്രമങ്ങള്‍ പൂര്‍ത്തിയാക്കുന്നതിന് മുന്‍പ് വിവാഹം കഴിക്കേണ്ടി വന്നുവെന്നും ഭര്‍ത്താവും പറയുന്നു. മഹല്ല് ഇടപെട്ടാണ് വിവാഹം നടത്തിയതെന്ന് താന്‍ അവകാശപ്പെട്ടിട്ടില്ലെന്നും നിക്കാഹ് കഴിക്കുകയാണ് ചെയ്തതെന്നുമാണ് ഇയാളുടെ വാദം. ഒരു വട്ടം മൊഴി ചൊല്ലിയ രേഖ മാത്രമാണ് മഹല്ലിന് ലഭിച്ചിരിക്കുന്നത്. നിക്കാഹായാലും മഹല്ലിന്റെ പങ്കാളിത്തമില്ലാതെ സാധുവാകില്ലെന്നും ഇതിനെ തള്ളി മഹല്ല് ജമാഅത്ത് വിശദീകരിക്കുന്നു.
അതിനിടെ ഇരയായ കുട്ടിയെ മെഡിക്കല്‍ ബോര്‍ഡിന് മുന്നില്‍ ഹാജരാക്കി. പ്രാഥമിക വിവരങ്ങള്‍ തേടിയ ശേഷം തിരിച്ചയച്ചു. കുട്ടികളുടെ മനശാസ്ത്ര വിദഗ്ദനുള്‍പ്പെടുന്ന വിശാല മെഡിക്കല്‍ ബോര്‍ഡ് രൂപീകരിക്കാന്‍ നിര്‍ദേശം നല്‍കി. മെഡിക്കല്‍ ബോര്‍ഡ് കുട്ടിയുടെ മാനസിക - ശാരീരിക നില പരിശോധിച്ച് ആവശ്യമെങ്കില്‍ കുട്ടിക്ക് തുടര്‍ കൗണ്‍സിലിങ് നല്‍കും. സംഭവത്തില്‍ അമ്മയുടെ കുടുംബം നല്‍കിയ പരാതി ഐജി ഹര്‍ഷിത അത്തല്ലൂരിയാണ് അന്വേഷിക്കുന്നത്.