‘മേഡ് ഇന്‍ ഇന്ത്യ’, രണ്ടാംഘട്ടം ആകുമ്പോഴേക്ക് 30 കോടി പേര്‍ക്ക് വാക്‌സീന്‍: പ്രധാനമന്ത്രി

ലോകത്തിലെ തന്നെ ഏറ്റവും വലിയ കൊവിഡ് വാക്‌സീനേഷന്‍ പദ്ധതി ഉദ്ഘാടനം ചെയ്ത് പ്രധാനമന്ത്രി നരേന്ദ്രമോദി. കൊവിന്‍ എന്ന ആപ്ലിക്കേഷന്‍ ബട്ടന്‍ ഉദ്ഘാടനം ചെയ്ത പ്രധാനമന്ത്രി സംസാരിക്കവേ ഒരു ഘട്ടത്തില്‍ വികാരാധീനനായി. ഏറെക്കാലം നീണ്ടുനില്‍ക്കുന്നതാകും വാക്‌സിനേഷന്‍ പദ്ധതിയെന്ന് മോദി പറഞ്ഞു. രണ്ടാംഘട്ടമാകുമ്പോഴേക്ക് 30 കോടി പേര്‍ക്ക് വാക്‌സീന്‍ നല്‍കും. മൂന്ന് കോടി മുന്നണിപ്പോരാളികള്‍ക്കുള്ള വാക്‌സീന്‍ ചെലവ് കേന്ദ്രസര്‍ക്കാര്‍ തന്നെ വഹിക്കുമെന്നും പ്രധാനമന്ത്രി നരേന്ദ്രമോദി വ്യക്തമാക്കി. അതേസമയം, വാക്‌സീനേഷനെതിരായ പ്രചാരണങ്ങളില്‍ വീണ് പോകരുതെന്നും മേഡ് ഇന്‍ ഇന്ത്യ വാക്‌സീനുകള്‍ പൂര്‍ണമായും സുരക്ഷിതമാണെന്നും പ്രധാനമന്ത്രി പറഞ്ഞു.
എത്രയോ മാസങ്ങളായുള്ള കാത്തിരിപ്പിന് അന്ത്യമായി എന്ന് പറഞ്ഞുകൊണ്ടാണ് പ്രധാനമന്ത്രി പ്രസംഗം തുടങ്ങിയത്. കുറെ നാളായി എല്ലാവരുടെയും ചോദ്യത്തിന് അവസാനമായി. വളരെപ്പെട്ടെന്ന് തന്നെ വാക്‌സീന്‍ എത്തി. ഇതിനായി പ്രയത്‌നിച്ച ശാസ്ത്രജ്ഞര്‍ക്ക് അഭിനന്ദനം നല്‍കുന്നു. ഇത് ഇന്ത്യയുടെ ശേഷിയുടെയും പ്രതിഭയുടെയും ഉദാഹരണമാണ്. രോഗസാധ്യത കൂടുതലുള്ളവര്‍ക്ക് ആദ്യം വാക്‌സീന്‍ നല്കുന്നു. കൂടുതല്‍ വാക്‌സീനുകള്‍ ഇന്ത്യ ഉത്പാദിപ്പിക്കും. കുത്തിവയ്പിന് വിപുലമായ വ്യവസ്ഥകള്‍ ഏര്‍പ്പെടുത്തി. മൂന്നുകോടി മുന്നണി പോരാളികളുടെ വാക്‌സിനേഷന്‍ ചെലവ് കേന്ദ്രം വഹിക്കും. രണ്ട് ഡോസ് കുത്തിവയ്പ് അനിവാര്യമാണ്. രണ്ട് ഡോസിനും ഇടയില്‍ ഒരു മാസത്തെ ഇടവേളയുണ്ടാകും. കുത്തിവയ്പ് കഴിഞ്ഞ് രണ്ടാഴ്ച കഴിഞ്ഞേ ഫലം കാണൂ.
കൊവിഡ് പ്രതിരോധ പ്രവര്‍ത്തനങ്ങളില്‍ കാണിച്ച ഉത്സാഹം ഇതിലും വേണമെന്ന് പ്രധാനമന്ത്രി പറയുന്നു. ലോകത്ത് ഇതു വരെ 3 കോടി പേര്‍ക്കേ വാക്‌സീന്‍ കിട്ടിയിട്ടുള്ളൂ എന്ന് പ്രധാനമന്ത്രി ഓര്‍മിപ്പിക്കുന്നു. ഇന്ത്യയില്‍ രണ്ടാം ഘട്ടം ആവുമ്പോഴേക്കും 30 കോടി പേര്‍ക്ക് വാക്‌സീന്‍ കിട്ടും. ഇന്ത്യയിലെ വാക്‌സീനില്‍ ലോകത്തിന് വിശ്വാസമുണ്ട്. രണ്ട് വാക്‌സീനുകളും വിജയിക്കുമെന്ന് പൂര്‍ണവിശ്വാസത്തോടെയാണ് ഇന്ത്യ മുന്നോട്ടുനീങ്ങു്‌നനത്. ഇന്ത്യയുടെ വാക്‌സീന്‍ മറ്റ് വാക്‌സീനുകളേക്കാള്‍ ലളിതമാണ്.
കൊവിഡിനെതിരായ പോരാട്ടം ജയിക്കാന്‍ വാക്‌സീനു കഴിയും. രാജ്യത്തിന്റെ ആത്മവിശ്വാസം ഇടിക്കാന്‍ അനുവദിക്കരുത്. സ്വയംപര്യാപ്തതയും ആത്മവിശ്വാസവും വാക്‌സിനേഷനിലും പ്രകടമാകണം. രാജ്യം ഒരു വര്‍ഷത്തില്‍ ഏറെ കാര്യങ്ങള്‍ പഠിച്ചു.
രാജ്യം ഒരു വര്‍ഷത്തില്‍ ഏറെ കാര്യങ്ങള്‍ പഠിച്ചുവെന്ന് പ്രധാനമന്ത്രി പറഞ്ഞു. രോഗിയെ ഒറ്റപ്പെടുത്തിയ രോഗമാണിത്. കുട്ടികള്‍ അമ്മയില്‍ നിന്ന് അകന്നു കഴിയേണ്ടി വന്നു. മരിച്ചവരുടെ അന്തിമസംസ്‌ക്കാരം പോലും യഥാവിധി നടത്താനായില്ല. വീട്ടില്‍ പോലും പോകാതെ ആരോഗ്യപ്രവര്‍ത്തകര്‍ ജീവനുകള്‍ രക്ഷിച്ചു. ആയിരക്കണക്കിനാളുകള്‍ ജീവന്‍ തന്നെ ബലി നല്കി. വാക്‌സീനേഷന്‍ ജീവത്യാഗം ചെയ്തവര്‍ക്കുള്ള ആദരാഞ്ജലി കൂടിയാണ്. ലോകം ഒരിക്കലും പ്രതീക്ഷിക്കാത്ത മഹാമാരിയാണ് ഉണ്ടായത്. ഇന്ത്യയിലെ വലിയ ജനസംഖ്യ ദൗര്‍ബല്യമായി മാറുമെന്ന് പലരും കരുതി. കൊവിഡ് ആദ്യ കേസ് സ്ഥിരീകരിക്കും മുമ്പ് തന്നെ ഇന്ത്യ നടപടി തുടങ്ങിയിരുന്നു. ആത്മവിശ്വാസം ഉണ്ടാക്കാന്‍ ജനത കര്‍ഫ്യൂവും ദീപം തെളിയിക്കലും സഹായിച്ചു. ലോക്ക്ഡൗണ്‍ പ്രഖ്യാപിക്കുക എളുപ്പമായിരുന്നില്ല. രാജ്യത്ത് എല്ലാം വ്യവസ്ഥയോടെ നടക്കാന്‍ സാധ്യമായതെല്ലാം ചെയ്തു. ജനങ്ങളുമായി താന്‍ നിരന്തരം സംസാരിച്ചു. വന്ദേഭാരത് മിഷനിലൂടെ രാജ്യം പ്രവാസികളെ തിരികെ എത്തിച്ചു. ഈ നടപടികളിലൂടെ രാജ്യത്ത് മരണനിരക്ക് കുറയ്ക്കാനായി. രണ്ടാഴ്ചയയായി ചില ജില്ലകളില്‍ കൊവിഡ് കേസുകള്‍ ഇല്ല. 150 രാജ്യങ്ങള്‍ക്ക് ഇന്ത്യ മരുന്നുകള്‍ എത്തിച്ചു. ഇന്ത്യയിലെ വാക്‌സിനേഷന്‍ പദ്ധതി ലോകം ശ്രദ്ധിക്കുന്നു. വാക്‌സിനേഷന്‍ പദ്ധതി ഏറെക്കാലം നീണ്ടു നില്ക്കും. മരുന്നിനൊപ്പം കരുതല്‍ എന്നതാവും മുദ്രാവാക്യം - പ്രധാനമന്ത്രി പറഞ്ഞു.