ഭാര്യയെ മണ്ണെണ്ണ ഒഴിച്ച് തീ കൊളുത്തിയ ഭര്‍ത്താവ് അറസ്റ്റില്‍

വഴക്കിനെ തുടര്‍ന്ന് ഭാര്യയെ മണ്ണെണ്ണ ഒഴിച്ച് കൊലപ്പെടുത്താന്‍ ശ്രമിച്ച ഭര്‍ത്താവിനെ അറസ്റ്റ് ചെയ്തു. വടമ പാണ്ട്യാലക്കല്‍ അനൂപ്(35) ആണ് അറസ്റ്റിലായത്. ഗുരുതരമായി പൊള്ളലേറ്റ ഭാര്യ സൗമ്യ തൃശൂര്‍ മെഡിക്കല്‍ കോളെജ് ആശുപത്രിയിലെ തീവ്രപരിചരണ വിഭാഗത്തിലാണ്. അനൂപിനെ തെളിവെടുപ്പിനായി വീട്ടിലെത്തിച്ചു. സംഭവം നടന്ന അലക്കുകല്ലിന് മുന്നിലെത്തി അനൂപ് പൊലീസിനോട് കാര്യങ്ങള്‍ വിശദീകരിച്ചു. മൊബൈല്‍ ഫോണിനെ ചൊല്ലി വഴക്കിട്ട ശേഷം വീടിന്റെ പിന്നിലെ അലക്കുകല്ലില്‍ ഇരിക്കുകയായിരുന്ന സൗമ്യയുടെ ശരീരത്തിലേക്ക്കുപ്പിയില്‍ കൊണ്ടുവന്ന മണ്ണെണ്ണ ഒഴിക്കുകയായിരുന്നു. തുടര്‍ന്ന് തൊട്ടടുത്ത അടുക്കളപ്പുരയിലെ അടുപ്പില്‍ കത്തിയിരുന്ന വിറകെടുത്ത് വസ്ത്രത്തിലേക്ക് തീ പകരുകയായിരുന്നു. വസ്ത്രത്തിലേക്ക് തീ ആളിപ്പടര്‍ന്നപ്പോള്‍ അനൂപിന്റെ അമ്മ അമ്മിണി ജലസംഭരണിയില്‍ നിന്ന് ബക്കറ്റില്‍ വെള്ളമെടുത്ത് ഒഴിച്ചാണ് അണച്ചത്. തുടര്‍ന്ന് സൗമ്യയുടെ കരച്ചില്‍ കേട്ട് ഓടിയെത്തിയ അയല്‍ക്കാരും ചേര്‍ന്നാണ് മാള ഗുരുധര്‍മ്മം മിഷന്‍ ആശുപത്രിയിലേക്ക് എത്തിച്ചത്. ഗുരുതരമായി പൊള്ളലേറ്റ സൗമ്യയെ മെഡിക്കല്‍ കോളേജ് ആശുപത്രിയിലേക്ക് മാറ്റി. 80 ശതമാനത്തോളം പൊള്ളലേറ്റിട്ടുള്ള സൗമ്യയുടെ മൊഴി പൊലീസ് രേഖപ്പെടുത്തിയിട്ടുണ്ട്. മദ്യപിച്ചെത്തുന്ന അനൂപ് ഭാര്യയുമായി വഴക്കിടുന്നതും മര്‍ദ്ദിക്കുന്നതും പതിവായിരുന്നു. മൂന്നാഴ്ച മുന്‍പ് വഴക്കിട്ട് വീട്ടില്‍ പോയ സൗമ്യയും വീട്ടുകാരും മാള പൊലീസില്‍ അനൂപിനെതിരെ പരാതി നല്‍കിയിരുന്നു. തുടര്‍ന്ന് പൊലീസിന്റെ സാന്നിദ്ധ്യത്തില്‍ ചര്‍ച്ച നടത്തി ഒത്തുതീര്‍പ്പിലെത്തിയിരുന്നു. പിന്നീട് സൗമ്യയെ വീണ്ടും വീട്ടിലേക്ക് കൂട്ടികൊണ്ടുവരികയായിരുന്നു. ഒന്‍പത് വര്‍ഷം മുന്‍പ് വിവാഹിതരായ ഇവര്‍ക്ക് എട്ടും രണ്ടും വയസുള്ള മക്കളുണ്ട്. രണ്ട് വയസുള്ള മകനും അമ്മയും മാത്രമേ സംഭവസമയത്ത് ഉണ്ടായിരുന്നുള്ളൂ. അനൂപിനെ തെളിവെടുപ്പിനായി കൊണ്ടുവന്നപ്പോള്‍ മകനെ തള്ളിപ്പറഞ്ഞ അമ്മ പൊട്ടിക്കരഞ്ഞു.