വാളയാര്‍ കേസില്‍ പുതിയ അന്വേഷണ സംഘം ഇന്ന് തുടര്‍ അന്വേഷണത്തിനുള്ള അപേക്ഷ നല്‍കും

പാലക്കാട് : വാളയാര്‍ കേസില്‍ പുതിയ അന്വേഷണ സംഘം ഇന്ന് തുടര്‍ അന്വേഷണത്തിനുള്ള അപേക്ഷ നല്‍കും. വിചാരണക്കോടതിയായ പാലക്കാട് പോക്‌സോ കോടതിയും പുനര്‍ വിചാരണ നടക്കാനിരിക്കെയാണ് റെയില്‍വേ എസ് പി ആര്‍ നിശാന്തിനിയുടെ നേതൃത്വത്തിലുള്ള പുതിയ അന്വേഷണ സംഘം തുടര്‍ അന്വേഷണത്തിനുള്ള അപേക്ഷ നല്‍കുന്നത്.

പാലക്കാട് ക്രൈംബ്രാഞ്ച് എസ്പി എ.എസ്-രാജു, കോഴിക്കോട് ഡിസിപി ഹേമലത എന്നിവര്‍ സംഘത്തില്‍ ഉണ്ട്. പാലക്കാട് പോക്‌സോ കോടതി വെറുതെ വിട്ട പ്രതികളേയും ഇന്ന് കോടതിയില്‍ ഹാജരാകും.
പ്രതികളായ വി മധു, എം മധു, ഷിബു എന്നിവര്‍ ഇന്ന് കോടതിയില്‍ ഹാജരാകും. പാലക്കാട് പോക്‌സോ കോടതി വെറുതെ വിട്ട മറ്റൊരു പ്രതിയായ ചേര്‍ത്തല സ്വദേശി പ്രദീപ് കുമാര്‍ രണ്ടു മാസം മുന്‍പ് ആത്മഹത്യ ചെയ്തിരുന്നു. പ്രായ പൂര്‍ത്തിയാകാത്ത പ്രതിയുടെ വിചാരണ ജുവനൈല്‍ കോടതിയില്‍ പുരോഗമിക്കുകയാണ്.

സര്‍ക്കാര്‍ നടപടിയില്‍ സന്തോഷമുണ്ടെന്ന് പെണ്‍കുട്ടികളുടെ അമ്മ ട്വന്റിഫോറിനോട് പ്രതികരിച്ചിരുന്നു. സര്‍ക്കാര്‍ നടപടിയില്‍ സന്തോഷമുണ്ടെന്നും കുറ്റക്കാരായ ഉദ്യോഗസ്ഥര്‍ക്കെതിരെ നടപടി എടുക്കും വരെ സമരം തുടരുമെന്നും പെണ്‍കുട്ടികളുടെ അമ്മ പ്രതികരിച്ചു. കേസ് സി ബി ഐ യ്ക്ക് വിടാന്‍ സംസ്ഥാന സര്‍ക്കാര്‍ തീരുമാനിച്ചിട്ടുണ്ടെങ്കിലും അതിനു ഇനിയും സമയമേറെ എടുക്കും.