കോട്ടയം മുണ്ടക്കയത്തെ വൃദ്ധന്റെ മരണം; മകന്‍ കസ്റ്റഡിയില്‍

കോട്ടയം മുണ്ടക്കയത്ത് ഭക്ഷണവും മരുന്നും നല്‍കാതെ ദിവസങ്ങളോളം പൂട്ടിയിട്ട പിതാവ് മരിച്ച സംഭവത്തില്‍ മകന്‍ കസ്റ്റഡിയില്‍. എണ്‍പതുകാരനായ പൊടിയന്‍ മരിച്ച സംഭവത്തിലാണ് മകന്‍ റെജികുമാറിനെ പൊലീസ് കസ്റ്റിഡയില്‍ എടുത്തത്. ഇയാള്‍ക്കെതിരെ മനഃപൂര്‍വമല്ലാത്ത നരഹത്യയ്ക്ക് കേസെടുത്തു. ചൊവ്വാഴ്ചയാണ് അസംബനി സ്വദേശിയായ പൊടിയന്‍ മരിച്ചത്. ഭക്ഷണവും മരുന്നും നല്‍കാതെ അച്ഛനേയും അമ്മയേയും റെജികുമാര്‍ പൂട്ടിയിടുകയായിരുന്നു. അയല്‍വാസികള്‍ വീട്ടില്‍ പ്രവേശിക്കാതിരിക്കാന്‍ പട്ടിയെ അഴിച്ചുവിടുകയും ചെയ്തിരുന്നു. ഭക്ഷണം ലഭിക്കാതെ അവശനിലയിലായ അവസ്ഥയിലായിരുന്നു പൊടിയന്‍. ജനപ്രതിനിധികള്‍ ഇടപെട്ടാണ് പൊടിയനേയും ഭാര്യയേയും ആശുപത്രിയില്‍ പ്രവേശിപ്പിച്ചത്. തുടര്‍ന്ന് പൊടിയന്‍ മരിച്ചു. മാനസികാസ്വാസ്ഥ്യം പ്രകടിപ്പിച്ച ഭാര്യ കോട്ടയം മെഡിക്കല്‍ കോളജില്‍ ചികിത്സയിലാണ്.