യെമനില്‍ വിമാനത്താവളത്തിന് സമീപം ഭീകരാക്രമണം; 10 പേര്‍ കൊല്ലപ്പെട്ടു

യെമന്റെ താല്‍ക്കാലിക തലസ്ഥാനമായ ഏദനില്‍ വിമാനത്താവളത്തിനു സമീപം ഉണ്ടായ ഭീകരാക്രമണത്തില്‍ 10 പേര്‍ മരിച്ചു. ഹൂതി വിമതരാണ് ആക്രമണത്തിന് പിന്നിലെന്നാണ് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നത്. ആക്രമണത്തില്‍ നിരവധി പേര്‍ കൊല്ലപ്പെടുകയോ പരുക്കേല്‍ക്കുകയോ ചെയ്തിട്ടുണ്ടാകാമെന്ന് ഇന്‍ഫര്‍മേഷന്‍ വകുപ്പ് മന്ത്രി അറിയിച്ചു. ഭീകരാക്രമണമാണെന്ന് പ്രധാനമന്ത്രി മുയീന്‍ അബ്ദുല്‍മലേക് സയീദ് പറഞ്ഞു. സ്ത്രീകളും കുട്ടികളും ഉള്‍പ്പെടെ മരിച്ചിട്ടുണ്ടെന്ന് ദൃക്സാക്ഷികള്‍ അറിയിച്ചു. ആക്രമണത്തിന്റെ ഉത്തരവാദിത്തം ഒരു സംഘടനയും ഏറ്റെടുത്തിട്ടില്ല. ഏദന്‍ മുന്‍ ഗവര്‍ണര്‍ വിമാനത്താവളത്തിലേക്ക് എത്തുന്ന സമയത്തായിരുന്നു ആക്രമണം. അദ്ദേഹത്തിനു പരുക്കില്ലെന്നും അധികൃതര്‍ പറഞ്ഞു. നിലവിലെ ഗവര്‍ണര്‍ക്കു നേരെ മൂന്നാഴ്ച മുമ്പ് ഉണ്ടായ ബോംബാക്രമണത്തില്‍ ആറു പേര്‍ മരിച്ചിരുന്നു.