ഛത്തീസ്ഗഡില്‍ ഏറ്റുമുട്ടലില്‍; 3 വനിതാ മാവോയിസ്റ്റുകള്‍ കൊല്ലപ്പെട്ടു

ഛത്തീസ്ഗഡില്‍ സുരക്ഷാ സേനയുമായുള്ള ഏറ്റുമുട്ടലില്‍ 3 വനിതാ മാവോയിസ്റ്റുകള്‍ കൊല്ലപ്പെട്ടു. ഛത്തീസ്ഗഡിലെ ദന്തേവാഡയില്‍ വച്ച് തിങ്കളാഴ്ചയാണ് മൂന്ന് വനിതാ മാവോയിസ്റ്റുകളുമായി ഏറ്റുമുട്ടല്‍ നടന്നത്. രാജെ മുചാക്കി, ഗീത മര്‍കം, ജ്യോതി നുപ്പോ എന്നിവരാണ് മരിച്ചത് എന്ന് പൊലീസ് തിരിച്ചറിഞ്ഞിട്ടുണ്ട്. ഇവര്‍ മാവോയിസ്റ്റുകളുടെ കടലിയന്‍ ഏരിയ കമ്മിറ്റിയുടെ അംഗങ്ങളാണ് എന്നും പൊലീസ് പറയുന്നു. ഏകദേശം 20 മിനിറ്റോളം വെടിവെപ്പ് നീണ്ടു നിന്നിരുന്നു എന്ന് ദന്തേവാഡ പൊലീസ് സൂപ്രണ്ട് അഭിഷേക് പല്ലവ പറഞ്ഞു. 12-ബോര്‍ തോക്ക്, രണ്ട് നാടന്‍ റിവോള്‍വറുകള്‍, സ്‌ഫോടകവസ്തുക്കള്‍, ഇലക്ട്രിക് വയറുകള്‍, മരുന്നുകള്‍, മാവോയിസ്റ്റ് പുസ്തകങ്ങള്‍ നിത്യോപയോഗ സാധനങ്ങള്‍ എന്നിവ ഏറ്റുമുട്ടല്‍ നടന്ന സ്ഥലത്ത് നിന്നും കണ്ടെടുത്തു. അദ്വാള്‍, കുഞ്ചേരസ് ഗ്രാമങ്ങള്‍ക്കിടയിലുള്ള വനത്തില്‍ ജില്ലാ റിസര്‍വ് ഗാര്‍ഡിന്റെ ഒരു സംഘം തെരച്ചില്‍ നടത്തുന്നതിനിടെയാണ് വെടിവയ്പ്പ് നടന്നത്. 15 പേര്‍ ഈ പ്രദേശത്ത് ക്യാമ്പ് ചെയ്യുന്നുണ്ടെന്ന് വിവരം ലഭിച്ചതിനെ തുടര്‍ന്നായിരുന്നു തെരച്ചില്‍ നടത്ത്. പൊലീസ് ക്യാമ്പിന് സമീപമുള്ള പ്രദേശവും മാവോയിസ്റ്റുകള്‍ രേഖാ ചിത്രങ്ങള്‍ തയാറാക്കിയിരുന്നതായി തെളിവുകള്‍ ലഭിച്ചിരുന്നു. ഏറ്റുമുട്ടല്‍ നടന്ന സ്ഥലത്തിന് സമീപം തിരച്ചില്‍ തുടരുകയാണെന്നും പൊലീസ് പറഞ്ഞു.