ന്യൂനപക്ഷ കോര്‍പ്പറേഷന്‍ ഭരണം മാണി ഗ്രൂപ്പിന്; ഐഎന്‍എല്ലില്‍ പ്രതിഷേധം, വില പേശലിനില്ലെന്ന് അഹമ്മദ് കോവില്‍

എല്‍ഡിഎഫിലെ ബോര്‍ഡ് കോര്‍പ്പറേഷന്‍ പദവികളുടെ വിഭജനത്തില്‍ ഐഎന്‍എല്ലിന് തിരിച്ചടി. ന്യൂനപക്ഷ കോര്‍പ്പറേഷന്‍ ഭരണം മാണി ഗ്രൂപ്പിന് നല്‍കാന്‍ എല്‍ഡിഎഫില്‍ ധാരണയായി. ഐഎന്‍എല്ലിന്റെ കൈവശമുണ്ടായിരുന്ന ന്യുനപക്ഷ കോര്‍പ്പറേഷന്‍ ചെയര്‍മാന്‍ സ്ഥാനമാണ് പുതിയതായി മുന്നണിയിലേക്ക് എത്തിയ കേരളാ കോണ്‍ഗ്രസ് എം വിഭാഗത്തിന് നല്‍കുന്നത്. ഇതടക്കം അഞ്ച് കോര്‍പ്പറേഷന്‍ ബോര്‍ഡുകളാണ് കേരളാ കോണ്‍ഗ്രസിന് ലഭിക്കുന്നത്. ന്യൂനപക്ഷ സ്‌കോളര്‍ഷിപ്പ് 80-20 അനുപാതവുമായി ബന്ധപ്പെട്ട് തര്‍ക്കം നിലനില്‍ക്കുന്ന സാഹചര്യത്തില്‍ കൂടിയാണ് ക്രിസ്ത്യന്‍ വിഭാഗത്തിനെ പ്രതിനിധാനം ചെയ്യുന്ന മാണി ഗ്രൂപ്പിന് ന്യൂനപക്ഷ കോര്‍പ്പറേഷന്‍ നല്‍കിയതെന്നാണ് വിവരം. ന്യൂനപക്ഷങ്ങളിലെ രണ്ടാമത്തെ വിഭാഗത്തെ പ്രതിനിധാനം ചെയ്യുന്ന പാര്‍ട്ടിക്ക് ന്യൂനപക്ഷ കോര്‍പ്പറേഷന്‍ ചെയര്‍മാന്‍ സ്ഥാനം നല്‍കിയ തീരുമാനത്തിനെതിരെ മുസ്ലിം വിഭാഗത്തിന് എതിര്‍പ്പുണ്ട്. ഐഎന്‍എല്‍ എതിര്‍പ്പ് മുന്നണിയെ അറിയിച്ചതായാണ് വിവരം. അതേ സമയം ന്യൂനപക്ഷ കോര്‍പ്പറേഷന്‍ ഭരണം കേരള കോണ്‍ഗ്രസ് എമ്മിന് നല്‍കിയതില്‍ പരാതിയും എതിര്‍പ്പുമില്ലെന്നാണ് വാര്‍ത്ത പുറത്ത് വന്നതോടെ ഐഎന്‍എല്‍ മന്ത്രി അഹമ്മദ് ദേവര്‍കോവില്‍ പ്രതികരിച്ചത്. ഇക്കാര്യത്തില്‍ ഐഎന്‍എല്ലില്‍ തര്‍ക്കമില്ലെന്നും മുന്നണിയില്‍ കൂടുതല്‍ പാര്‍ട്ടികള്‍ വരുമ്പോള്‍ വിട്ടുവീഴ്ചകള്‍ വേണ്ടിവരുമെന്നുമാണ് മന്ത്രിയുടെ പ്രതികരണം. ''ഐഎന്‍ എല്‍ മുന്നണിക്ക് പുറത്തു നില്‍ക്കുമ്പോഴാണ് കോര്‍പ്പറേഷന്‍ ചെയര്‍മാന്‍ സ്ഥാനം എല്‍ഡിഎഫ് നല്‍കിയത്. അതിന് ശേഷം മുന്നണിയുടെ ഭാഗമായപ്പോള്‍ മന്ത്രിസ്ഥാനം തന്നെ നല്‍കാന്‍ ഇടത് മുന്നണി തയ്യാറായി. കോര്‍പ്പറേഷന്‍ പദവിയുമായി ബന്ധപ്പെട്ട് തര്‍ക്കമില്ലെന്നും വിലപേശല്‍ ഐഎന്‍എല്‍ നയമല്ലെന്നും അദ്ദേഹം കൂട്ടിച്ചേര്‍ത്തു. കോടിയേരി ബാലകൃഷ്ണനെ കണ്ട് പ്രതിഷേധം അറിയിച്ചെന്ന വാര്‍ത്തകളില്‍ യാഥാര്‍ത്ഥ്യമില്ലെന്ന് അറിയിച്ച അദ്ദേഹം, ചില ആവശ്യങ്ങള്‍ക്ക് വേണ്ടി കോടിയേരിയെ കണ്ടുവെന്നും ചിലതെല്ലാം ഉന്നയിച്ചുവെന്നും വിശദീകരിച്ചു.