അമ്മയുടെ മരണം; മായാവതിയെ സന്ദര്‍ശിച്ച് അനുശോചനം അറിയിച്ച് പ്രിയങ്ക

ബിഎസ്പി അധ്യക്ഷ മായാവതിയെ ഡല്‍ഹിയിലെ വസതിയില്‍ സന്ദര്‍ശിച്ച കോണ്‍ഗ്രസ് നേതാവ് പ്രിയങ്ക ഗാന്ധി, അമ്മയുടെ നിര്യാണത്തില്‍ അനുശോചനം അറിയിച്ചു. ത്യാഗരാജ് മാര്‍ഗിലെ വസതിയില്‍ പുലര്‍ച്ചെയായിരുന്നു സന്ദര്‍ശനം. ഡല്‍ഹിയിലെ ആശുപത്രിയില്‍ ചികിത്സയിലിരിക്കെ, ഹൃദയത്തിന്റെ പ്രവര്‍ത്തനം നിലച്ചതുമൂലം ശനിയാഴ്ചയായിരുന്നു മായാവതിയുടെ അമ്മ രാംരതിയുടെ (92) മരണം. അമ്മയുടെ മരണവിവരം അറിഞ്ഞതിനു പിന്നാലെയാണു മായാവതി യുപിയില്‍നിന്നു ഡല്‍ഹിയിലേക്കു തിരിച്ചത്. മായാവതിയുടെ അച്ഛന്‍ കഴിഞ്ഞ വര്‍ഷം മരിച്ചിരുന്നു. അടുത്ത വര്‍ഷം നടക്കുന്ന യുപി നിയമസഭാ തിരഞ്ഞെടുപ്പില്‍, ഒരു രാഷ്ട്രീയ കക്ഷിയുമായും സഖ്യത്തിനില്ലെന്നും 2007ലെപ്പോലെ ബിഎസ്പിക്കു കേവല ഭൂരിപക്ഷം ലഭിക്കുമെന്നും മായാവതി കഴിഞ്ഞ ദിവസം പ്രതികരിച്ചിരുന്നു. എസ്പിയും ബിജെപിയും ഒരേ നാണയത്തിന്റെ രണ്ടു വശങ്ങളാണെന്ന് അഭിപ്രായപ്പെട്ട മായാവതി, കോണ്‍ഗ്രസിനെയും വിമര്‍ശിച്ചിരുന്നു. വോട്ടര്‍മാരെ കോണ്‍ഗ്രസ് തെറ്റായ വാഗ്ദാനങ്ങള്‍ നല്‍കി വഞ്ചിക്കുകയാണെന്നാണു മായാവതി പറഞ്ഞത്. 2017ലെ നിയമസഭാ തിരഞ്ഞെടുപ്പില്‍, 312 സീറ്റുകള്‍ നേടിയ ബിജെപി ചരിത്ര വിജയമാണു യുപിയില്‍ കൈവരിച്ചത്.