ജമ്മുവില്‍ മൂന്ന് വര്‍ഷത്തിനിടെ ഉണ്ടായത് 1,033 ഭീകരാക്രമണങ്ങള്‍

ജമ്മു കശ്മീരില്‍ കഴിഞ്ഞ മൂന്ന് വര്‍ഷത്തിനിടെ ഉണ്ടായത് 1,033 ഭീകരാക്രമണങ്ങള്‍. 2019 ല്‍ പരമാവധി 594 ആക്രമണങ്ങളാണ് റിപ്പോര്‍ട്ട് ചെയ്യപ്പെട്ടതെന്ന് സര്‍ക്കാര്‍ രാജ്യസഭയെ അറിയിച്ചു. കേന്ദ്ര ഭരണപ്രദേശത്ത് കഴിഞ്ഞ വര്‍ഷം 244 ഭീകരാക്രമണങ്ങള്‍ റിപ്പോര്‍ട്ട് ചെയ്യപ്പെട്ടപ്പോള്‍ നടപ്പുവര്‍ഷത്തെ എണ്ണം നവംബര്‍ 15 വരെ 196 ആണെന്നും പ്രതിരോധ സഹമന്ത്രി അജയ് ഭട്ട് സഭയെ അറിയിച്ചു. രാജ്യത്ത് 2019 മുതല്‍ 2021 നവംബര്‍ പകുതി വരെ ഉണ്ടായിട്ടുള്ള 1,034 ഭീകരാക്രമണങ്ങളില്‍ ഒരെണ്ണം മാത്രമാണ് ഡല്‍ഹിയില്‍ നിന്നും റിപ്പോര്‍ട്ട് ചെയ്യപ്പെട്ടത്. ഈ കാലയളവില്‍ കേന്ദ്ര സായുധ പൊലീസ് സേനയിലെ(സിഎപിഎഫ്) 177 പേര്‍ തീവ്രവാദ വിരുദ്ധ ഓപ്പറേഷനില്‍ കൊല്ലപ്പെട്ടതായും ഭട്ട് വ്യക്തമാക്കി. 2019 ല്‍ 80 പേരും 2020 ല്‍ 62 പേരും ഈ വര്‍ഷം (നവംബര്‍ 15 വരെ) 35 പേരും മരിച്ചു. കഴിഞ്ഞ മൂന്ന് വര്‍ഷത്തിനിടെ രാജ്യത്ത് നടന്ന ഭീകരാക്രമണങ്ങളുടെ എണ്ണവും ആക്രമണത്തില്‍ കൊല്ലപ്പെട്ട സായുധ സേനാംഗങ്ങളുടെ എണ്ണവും സംബന്ധിച്ച ചോദ്യത്തിന് മറുപടി പറയുകയായിരുന്നു മന്ത്രി. തീരദേശ, കടല്‍, കടല്‍ സുരക്ഷ എന്നിവ ശക്തിപ്പെടുത്തുന്നതിന് സര്‍ക്കാര്‍ നിരവധി നടപടികള്‍ സ്വീകരിച്ചിട്ടുണ്ടെന്നും ഭട്ട് സഭയെ അറിയിച്ചു