എണ്ണിത്തീരാതെ കോടികള്‍, നിറഞ്ഞ് അലമാര; യുപിയില്‍ വ്യാപാരിയുടെ വീട്ടില്‍ റെയ്ഡ്

കാന്‍പുരില്‍ സുഗന്ധവ്യാപാരിയുടെ വിവിധ സ്ഥാപനങ്ങളില്‍ ആദായനികുതി വകുപ്പ് നടത്തിയ പരിശോധനയില്‍ 150 കോടിയോളം രൂപ പിടിച്ചെടുത്തു. പിയൂഷ് ജെയ്ന്‍ എന്ന വ്യക്തിയുമായി ബന്ധപ്പെട്ട സ്ഥാപനങ്ങളില്‍നിന്നാണ് ഇത്രയധികം രൂപ പിടിച്ചെടുത്തത്. കണ്ടെടുത്തതില്‍ എണ്ണിത്തീര്‍ന്നത് ഇത്രയുമാണെന്നും ബാക്കി എണ്ണിക്കൊണ്ടിരിക്കുകയാണെന്നും സെന്‍ട്രല്‍ ബോര്‍ഡ് ഓഫ് ഇന്‍ഡയറക്ട് ടാക്‌സസ് ആന്‍ഡ് കസ്റ്റംസ് (സിബിഐസി) ചെയര്‍മാന്‍ വിവേക് ജോറി അറിയിച്ചു. സിബിഐസിയുടെ ചരിത്രത്തിലെ ഏറ്റവും വലിയ വീണ്ടെടുപ്പാണ് ഇതെന്ന് അദ്ദേഹം പറഞ്ഞു. ഇതുവരെ അറസ്റ്റൊന്നും രേഖപ്പെടുത്തിയിട്ടില്ല. സിബിഐസിയും ആദായ നികുതി വകുപ്പും ജിഎസ്ടിയും സംയുക്തമായാണ് റെയ്ഡ് നടത്തിയത്. ജെയ്നിന്റെ വീട്ടിലെ അലമാരകളില്‍ നോട്ടുകെട്ടുകള്‍ അടങ്ങിയ കവറുകള്‍ അടുക്കി വച്ചിരിക്കുന്ന ചിത്രം പുറത്തുവന്നിരുന്നു. പേപ്പര്‍ കവറുകളിലാക്കി മഞ്ഞ ടേപ്പ് ഒട്ടിച്ചാണ് നോട്ടുകള്‍ സൂക്ഷിച്ചിരിക്കുന്നത്. ഉദ്യോഗസ്ഥര്‍ നിലത്തിരുന്ന് നോട്ടുകള്‍ എണ്ണുന്നതിന്റെ ചിത്രങ്ങളും പുറത്തുവന്നു. ഇവര്‍ക്കു ചുറ്റും നോട്ടുകളുടെ കൂമ്പാരവും കാണാം. നോട്ടെണ്ണല്‍ യന്ത്രവും ചിത്രത്തിലുണ്ട്. വ്യാഴാഴ്ച തുടങ്ങിയ റെയ്ഡ് ഇപ്പോഴും തുടരുകയാണെന്ന് ഉദ്യോഗസ്ഥര്‍ അറിയിച്ചു. ജെയ്നിന്റെ ഉടമസ്ഥതയിലുള്ള മുംബൈയിലെയും ഗുജറാത്തിലെയും സ്ഥാപനങ്ങളിലും റെയ്ഡ് നടക്കുന്നുണ്ട്. ഇല്ലാത്ത കമ്പനികളുടെ പേരില്‍ വ്യാജ വിലവിവരപട്ടിക തയാറാക്കി ഇടപാടുകള്‍ കാണിച്ചാണു നികുതി വെട്ടിച്ചതെന്ന് ജിഎസ്ടി ഉദ്യോഗസ്ഥര്‍ വ്യക്തമാക്കി. 200 വിലവിവര പട്ടികയിലായാണ് ഇടപാടുകള്‍ രേഖപ്പെടുത്തിയത്. അയ്യായിരത്തോളം രൂപയാണ് ഓരോ പട്ടികയിലും രേഖപ്പെടുത്തിയിരിക്കുന്നതെന്നും ഉദ്യോഗസ്ഥര്‍ അറിയിച്ചു. നാലു ട്രക്കുകളിലായാണ് സാധനങ്ങള്‍ ജിഎസ്ടി അടയ്ക്കാതെ കടത്തിയിരുന്നത്. ഈ ട്രക്കുകളെല്ലാം പിടിച്ചെടുത്തു.