ഭക്ഷ്യവിഷബാധ; പൂനെയില്‍ 31 വിദ്യാര്‍ത്ഥിനികളെ ആശുപത്രിയില്‍ പ്രവേശിപ്പിച്ചു

ഭക്ഷ്യവിഷബാധയെ തുടര്‍ന്ന് പൂനെയില്‍ 31 വിദ്യാര്‍ത്ഥിനികളെ ആശുപത്രിയില്‍ പ്രവേശിപ്പിച്ചു. കുസ്ഗാവിലെ ഫ്‌ലോറ ഇന്‍സ്റ്റിറ്റ്യൂട്ട് ഓഫ് ടെക്നോളജിയിലെ നവ് ഗുരുകുല്‍ പരിശീലന കേന്ദ്രത്തിലെ പെണ്‍കുട്ടികള്‍ക്കാണ് ഭക്ഷ്യവിഷബാധയേറ്റത്. ഡിസംബര്‍ 25 ന് നടന്ന ഒരു പാര്‍ട്ടിയില്‍ വിദ്യാര്‍ത്ഥികള്‍ ഭക്ഷണം കഴിച്ചിരുന്നു. ഇന്നലെ മുതല്‍ ഇവര്‍ക്ക് ആരോഗ്യ പ്രശ്‌നങ്ങള്‍ അനുഭവപ്പെട്ടു. തുടര്‍ന്നാണ് വിദ്യാര്‍ത്ഥിനികളെ ആശുപത്രിയിലേക്ക് മാറ്റിയത്. പൂനെയിലെ ഭോര്‍ തെഹ്സിലിലെ ബ്ലോക്ക് ഡെവലപ്മെന്റ് ഓഫീസര്‍ വിശാല്‍ തന്‍പുരെ അറിയിച്ചു. ''എല്ലാ വിദ്യാര്‍ത്ഥികളും സുരക്ഷിതരാണ്, നിരീക്ഷണത്തിലാണ്. പ്രാദേശിക ഭരണകൂടം അന്വേഷണം ആരംഭിക്കുകയും സ്ഥലത്ത് നിന്ന് ഭക്ഷണത്തിന്റെയും വെള്ളത്തിന്റെയും സാമ്പിളുകള്‍ ശേഖരിക്കാന്‍ ഒരു സംഘത്തെ അയച്ചിട്ടുണ്ട്,'' അദ്ദേഹം കൂട്ടിച്ചേര്‍ത്തു.