മരിച്ചെന്ന് ഉറപ്പിച്ചു; തീ കത്തിക്കാന്‍ ഒരുങ്ങുമ്പോള്‍ കണ്ണ് തുറന്നു: വിഡിയോ

മരിച്ചെന്ന് സ്ഥിരീകരിച്ചശേഷം അന്ത്യകര്‍മങ്ങള്‍ക്കായി കൊണ്ടുപോയയാള്‍ക്ക് അവസാന നിമിഷം ജീവനുണ്ടെന്ന് കണ്ടെത്തി. 'മരിച്ചയാള്‍' കണ്ണ് തുറന്നതോടെയാണ് ഏവരെയും ഞെട്ടിക്കുന്ന സംഭവം ഉണ്ടായത്. ഡല്‍ഹിയിലെ നരേലയില്‍ തിക്രി ഖുര്‍ദ് എന്ന ഗ്രാമത്തിലെ സതീശ് ഭരദ്വാജ് എന്ന 62 വയസ്സുകാരനാണ് ഞായറാഴ്ച രാവിലെ 'മരിച്ചത്'. കുടുംബാംഗങ്ങള്‍ മരണം സ്ഥിരീകരിക്കുകയും ചെയ്തു. അന്ത്യകര്‍മങ്ങള്‍ക്കായി ശ്മശാനത്തിലേക്ക് കൊണ്ടുപോയി. തീ കത്തിക്കുന്നതിനു മുന്‍പായി മുഖത്ത് ഇട്ടിരുന്ന തുണി മാറ്റിയപ്പോഴാണ് മൃതദേഹത്തില്‍ ജീവന്‍ തുടിക്കുന്നുണ്ടെന്ന് കണ്ടെത്തിയത്. പിന്നാലെ സതീശ് കണ്ണുകളും തുറക്കുകയും ശ്വസനം സാധാരണനിലയിലാകുകയും ചെയ്തു. വിചിത്ര സംഭവം കണ്ട് കൂടിനിന്ന ആളുകളും ഞെട്ടി. ജീവനുണ്ടെന്ന് തിരിച്ചറിഞ്ഞതോടെ ആംബുലന്‍സ് വിളിച്ച് ആശുപത്രിയിലെത്തിച്ചെന്നു പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. സതീശ് അര്‍ബുദം ബാധിച്ച് ഏറെ നാളായി ആശുപത്രിയില്‍ ചികിത്സയിലായിരുന്നുവെന്നാണ് വീട്ടുകാര്‍ പറയുന്ന വിവരം. വെന്റിലേറ്ററില്‍ ഗുരുതരാവസ്ഥയില്‍ കഴിയുന്നതിനിടെ മരിച്ചെന്ന് സ്ഥിരീകരിക്കുകയായിരുന്നു.