തൊഴില്‍ ഇല്ലാത്തവര്‍ക്ക് മാസം 3,016 രൂപ; വാഗ്ദാനം നടപ്പാക്കാന്‍ തെലങ്കാന സര്‍ക്കാര്‍

തെലങ്കാനയില്‍ തൊഴിലില്ലായ്മാ വേതനം പ്രഖ്യാപിച്ച് മുഖ്യമന്ത്രി കെ.ചന്ദ്രശേഖരറാവു. സംസ്ഥാനത്തു തൊഴില്‍ ഇല്ലാത്ത എല്ലാ യുവതീയുവാക്കള്‍ക്കും പ്രതിമാസം 3,016 രൂപ നല്‍കുമെന്നാണ് റിപ്പോര്‍ട്ട്. ഈ വര്‍ഷം ഏപ്രില്‍ മുതല്‍ ഈ തുക വിതരണം ചെയ്യുമെന്നാണ് സൂചന. 2018ലെ നിയമസഭാ തിരഞ്ഞെടുപ്പ് പ്രചാരണ വേളയിലാണ് തൊഴില്‍രഹിതര്‍ക്ക് വേതനം നല്‍കുമെന്ന് ടിആര്‍എസ് പ്രഖ്യാപിച്ചത്. അധികാരത്തിലെത്തി മൂന്നുവര്‍ഷം കഴിഞ്ഞാണ് വാഗ്ദാനം നടപ്പിലാക്കാന്‍ ഒരുങ്ങുന്നത്. ഇതിനെതിരെ കടുത്ത പ്രതിഷേധം ഉയര്‍ന്നു. സംസ്ഥാനത്ത് തൊഴിലവസരങ്ങള്‍ കുറയുന്നതില്‍ പ്രതിഷേധിച്ച് യുവാക്കള്‍ രംഗത്തെത്തിയിരുന്നു. 29 ലക്ഷത്തോളം യുവജനങ്ങളാണ് തെലങ്കാന സര്‍ക്കാര്‍ സൈറ്റില്‍ ജോലിക്കായി അപേക്ഷിച്ചത്. എംപ്ലോയ്മെന്റ് ഓഫിസില്‍ 10 ലക്ഷത്തോളം പേരും രജിസ്റ്റര്‍ ചെയ്തിട്ടുണ്ട്. അതേസമയം, ജോലിക്കായി അപേക്ഷിച്ചവരില്‍ അധികവും സ്വകാര്യ സ്ഥാപനങ്ങളില്‍ ജോലി ചെയ്യുന്നവരാണെന്ന് സര്‍ക്കാര്‍ പറഞ്ഞു. 'തൊഴിലില്ലായ്മാ വേതനം' ലഭ്യമാക്കാനുള്ള മാനദണ്ഡങ്ങള്‍ തീരുമാനിക്കുന്നതില്‍ വന്ന കാലതാമസം വിതരണം വൈകിപ്പിച്ചെന്നാണു സര്‍ക്കാര്‍ വിശദീകരണം.