‘ഇന്ത്യയില്‍ കോവിഡിന്റെ മൂന്നാം തരംഗം; ഒമിക്രോണ്‍ കൂടുന്നത് ഇതിന്റെ തെളിവ്’

മഹാമാരിയുടെ മൂന്നാം തരംഗമാണു രാജ്യത്തു ദൃശ്യമാകുന്നതെന്നു കോവിഡ് വാക്‌സീന്‍ ടാസ്‌ക് ഫോഴ്‌സ് മേധാവി ഡോ. എന്‍.കെ.അറോറ. മെട്രോ നഗരങ്ങളില്‍ ഒമിക്രോണ്‍ കേസുകള്‍ കൂടുതലായി റിപ്പോര്‍ട്ട് ചെയ്യുന്നത് ഇതിന്റെ ഭാഗമാണ്. മുംബൈ, ഡല്‍ഹി, കൊല്‍ക്കത്ത എന്നിവിടങ്ങളിലെ ആകെ കേസുകളുടെ 75 ശതമാനവും ഒമിക്രോണ്‍ വകഭേദമാണെന്നും അദ്ദേഹം പറഞ്ഞു. 'ഇന്ത്യയില്‍ മൂന്നാംതരംഗമാണെന്നു വ്യക്തമാണ്. കൊറോണ വൈറസിന്റെ പുതിയ വകഭേദമായ ഒമിക്രോണ്‍ ആണു മൂന്നാം തരംഗത്തിന് ആക്കം കൂട്ടുന്നത്. ഒമിക്രോണ്‍ കേസുകള്‍ ഓരോ ആഴ്ചയും കൂടുന്നു. ആകെ കോവിഡ് കേസുകളിലെ ഒമിക്രോണ്‍ ബാധിതരുടെ ശതമാനവും കൂടുകയാണ്. കഴിഞ്ഞ നാലഞ്ചു ദിവസത്തെ കണക്കുകള്‍ ഇതിനു തെളിവാണ്'- നാഷനല്‍ ടെക്‌നിക്കല്‍ അഡൈ്വസറി ഗ്രൂപ്പ് ഓണ്‍ ഇമ്യൂണൈസേഷന്‍ (എന്‍ടിഎജിഐ) ചെയര്‍മാന്‍ അറോറ എന്‍ഡിടിവിയോടു പറഞ്ഞു. ഇതുവരെ 1,700 ഒമിക്രോണ്‍ കേസുകളാണു രാജ്യത്തു റിപ്പോര്‍ട്ട് ചെയ്തിട്ടുള്ളത്. 510 കേസുകളുള്ള മഹാരാഷ്ട്രയാണ് ഒന്നാമത്. പുതിയതായി സ്ഥിരീകരിക്കുന്ന കോവിഡ് കേസുകളില്‍ 22 ശതമാനം വര്‍ധനയുണ്ടെന്നും സര്‍ക്കാര്‍ ഡേറ്റ പറയുന്നു. അതേസമയം, കോവിഡ് വാക്‌സീന്റെ സംഭരണ കാലാവധി (ഷെല്‍ഫ് ലൈഫ്) 12 മാസം വരെയാണെന്നും, 15-18 പ്രായക്കാര്‍ക്കു നല്‍കുന്ന ഡോസ് സുരക്ഷിതമല്ലെന്ന ആശങ്ക അനാവശ്യമാണെന്നും അറോറ വ്യക്തമാക്കി.