ഗര്‍ഭസ്ഥശിശുവിന് പ്രശ്നമുണ്ടെങ്കില്‍ ഭ്രൂണഹത്യ അമ്മയ്ക്ക് തീരുമാനിക്കാം -ഡല്‍ഹി ഹൈക്കോടതി

ന്യൂഡല്‍ഹി: ഗര്‍ഭസ്ഥശിശുവിന് കുഴപ്പങ്ങളുണ്ടെന്ന് മെഡിക്കല്‍ ബോര്‍ഡ് കണ്ടെത്തിയാല്‍ അതുമായി മുന്നോട്ടുപോകണമോയെന്ന് തീരുമാനിക്കാന്‍ അമ്മയ്ക്ക് അവകാശമുണ്ടെന്ന് ഡല്‍ഹി ഹൈക്കോടതി. കുഞ്ഞിന് വിവിധ പ്രശ്‌നങ്ങളുണ്ടെന്ന് കണ്ടെത്തിയ സാഹചര്യത്തില്‍ 28 ആഴ്ച പ്രായമായ ഗര്‍ഭം അലസിപ്പിക്കാന്‍ 33-കാരിക്ക് അനുമതി നല്‍കിക്കൊണ്ടാണ് ഹൈക്കോടതിയുടെ പരാമര്‍ശം. പ്രത്യുത്പാദനപരമായ കാര്യങ്ങളില്‍ തീരുമാനമെടുക്കുന്നത് സ്ത്രീയുടെ വ്യക്തിസ്വാതന്ത്ര്യത്തിന്റെ ഭാഗമാണ്. ഗര്‍ഭസ്ഥശിശുവിന് ഒന്നിലേറെ പ്രശ്‌നങ്ങളുണ്ടെന്ന് മെഡിക്കല്‍ ബോര്‍ഡ് അഭിപ്രായപ്പെട്ട സ്ഥിതിക്ക് അതുമായി മുന്നോട്ടുപോകണമോയെന്ന് തീരുമാനിക്കാനുള്ള അമ്മയുടെ അവകാശം നിഷേധിക്കാനാവില്ലെന്ന് ജസ്റ്റിസ് ജ്യോതി സിങ് പറഞ്ഞു. ഗര്‍ഭച്ഛിദ്ര നിയമപ്രകാരം 24 ആഴ്ചവരെയുള്ള ഗര്‍ഭം മാത്രമേ അലസിപ്പിക്കാന്‍ അനുമതി നല്‍കാവൂ. ഈ സമയപരിധി അവസാനിച്ചതിനാലാണ് പരാതിക്കാരി ഹൈക്കോടതിയെ സമീപിച്ചത്. കുഞ്ഞിന്റെ ആരോഗ്യസ്ഥിതി പരിശോധിക്കാന്‍ മെഡിക്കല്‍ ബോര്‍ഡ് രൂപവത്കരിക്കാന്‍ എയിംസിനോട് ഹൈക്കോടതി ആവശ്യപ്പെട്ടിരുന്നു. കുഞ്ഞ് ജനിച്ചുകഴിഞ്ഞാല്‍ ആദ്യകാലങ്ങളില്‍ വര്‍ഷത്തില്‍ രണ്ടോ മൂന്നോ ഹൃദയശസ്ത്രക്രിയയും പിന്നീട് വര്‍ഷത്തില്‍ ഓരോ ശസ്ത്രക്രിയയും വേണ്ടിവന്നേക്കുമെന്നാണ് ബോര്‍ഡ് പറഞ്ഞത്. അപൂര്‍വമായ ഹൃദ്രോഗമുള്ള കുഞ്ഞാണെന്നും കണ്ടെത്തി. ഇക്കാരണത്താല്‍ വലിയ മാനസിക സമ്മര്‍ദമാണ് അമ്മ അനുഭവിക്കുന്നതെന്നും ബോര്‍ഡ് അഭിപ്രായപ്പെട്ടതിനെത്തുടര്‍ന്നാണ് ഹൈക്കോടതിയുടെ തീരുമാനം.