ബോംബ് ഭീഷണി; അല്‍ഖ്വയ്ദ സംഘടനയുടെ അവകാശവാദം വ്യാജമെന്ന് ഡല്‍ഹി പൊലീസ്

ഘാസിപൂര്‍ മാണ്ഡി ബോംബ് ഭീഷണിയുമായി ബന്ധപ്പെട്ട് ഇസ്ലാമിസ്റ്റ് തീവ്രവാദ സംഘടനയുടെ അവകാശവാദങ്ങള്‍ വ്യാജമാണെന്ന് ഡല്‍ഹി പൊലീസ്. ഭീകരാക്രമണ ശ്രമത്തിന് പിന്നില്‍ അന്‍സാര്‍ ഗസ്വത്-ഉല്‍-ഹിന്ദ് സംഘമാണോ ഉത്തരവാദിയെന്ന് അന്വേഷിച്ച് വരികയാണെന്ന് ഭീകരവിരുദ്ധ സ്‌ക്വാഡിലെ പ്രത്യേക സെല്ലിലെ മുതിര്‍ന്ന ഉദ്യോഗസ്ഥര്‍ പറഞ്ഞു. വെള്ളിയാഴ്ചയാണ് ഗാസിപൂര്‍ പൂ മാര്‍ക്കറ്റില്‍ നിന്ന് ഒരു ബാഗ് നിറയെ സ്ഫോടകവസ്തുക്കള്‍ കണ്ടെടുത്തത്. സ്ഫോടനത്തിനായി ആര്‍ഡിഎക്സിന്റെയും അമോണിയ നൈട്രേറ്റിന്റെയും മിശ്രിതമാണെന്ന് ഉപയോഗിച്ചിരിക്കുന്നതെന്ന് എന്‍എസ്ജി സ്ഥിരീകരിച്ചു. ഈ ശ്രമത്തിന് ഉത്തരവാദികളായ തീവ്രവാദ സംഘടനയെ ഇതുവരെ കണ്ടെത്തിയിട്ടില്ല. സംഭവത്തില്‍ ഡല്‍ഹി പൊലീസ് കേസെടുത്ത് അന്വേഷണം ആരംഭിച്ചു. സ്ഫോടകവസ്തുക്കള്‍ ലഭിച്ചതിന് ശേഷം മാര്‍ക്കറ്റ് മുഴുവന്‍ ഒഴിപ്പിക്കുകയും ദേശീയ സുരക്ഷാ ഗാര്‍ഡ് (എന്‍എസ്ജി) ഐഇഡി നിര്‍വീര്യമാക്കുകയും ചെയ്തിരുന്നു. ''സോഷ്യല്‍ മീഡിയ നിരീക്ഷണത്തിനിടെ, ആക്രമണശ്രമത്തിന്റെ ഉത്തരവാദിത്തം ഏറ്റെടുത്ത് അന്‍സാര്‍ ഗസ്വത്-ഉല്‍-ഹിന്ദിന്റെ ഒരു കത്ത് ഞങ്ങള്‍ക്ക് ലഭിച്ചു. ഈ ഗ്രൂപ്പ് താരതമ്യേന ഒരു പുതിയ സംഘടനയാണ്. കുറിപ്പിന്റെ ആധികാരിക ഉറവിടം ഞങ്ങള്‍ ഇതുവരെ കണ്ടെത്തിയിട്ടില്ല,'' മുതിര്‍ന്ന പൊലീസ് ഉദ്യോഗസ്ഥന്‍ അറിയിച്ചു. 'ചില സാങ്കേതിക തകരാര്‍ മൂലമാണ് ഉപകരണം പൊട്ടിത്തെറിക്കാത്തതെന്നും സോഷ്യല്‍ മീഡിയയില്‍ പ്രചരിക്കുന്ന കത്തില്‍ പറയുന്നു. എന്നാല്‍ അടുത്ത തവണയും ഇത് സംഭവിക്കുമെന്ന് ഇതിനര്‍ത്ഥമില്ല..' കത്തില്‍ പറയുന്നു. ഇത് അന്വേഷണത്തെ വഴിതെറ്റിക്കാനുള്ള ശ്രമമാണ് ഇതെന്ന് പൊലീസ് പറയുന്നു.