ഡല്‍ഹിയില്‍ പീഡനത്തിനിരയായ യുവതിയെ ചെരുപ്പുമാല അണിയിച്ചു; നഗര പ്രദക്ഷിണം ചെയ്യിച്ചു

കൂട്ട ബലാത്സംഗത്തിനിരയായ യുവതി രാജ്യതലസ്ഥാനത്ത് പൊതുമധ്യത്തില്‍ നേരിട്ടത് സമാനതകളില്ലാത്ത അപമാനം. പീഡനത്തിനിരയായ യുവതിയെ തട്ടികൊണ്ടുപോയി തലമുടി മുറിച്ചു. മുഖത്തു കരി ഓയില്‍ പുരട്ടി. ചെരുപ്പുമാല അണിയിച്ചു നഗര മധ്യത്തിലൂടെ പ്രദക്ഷിണം ചെയ്യിച്ചു. സംഭവത്തില്‍ നാലു സ്ത്രീകളെ അറസ്റ്റ് ചെയ്തതായി വനിതാ കമ്മീഷന്‍ അറിയിച്ചു. യുവതിയെ അപമാനിക്കുന്നത് നോക്കിനിന്ന ആള്‍ക്കൂട്ടം ആക്രമത്തെ കൈയ്യടിച്ചു പ്രോത്സാഹിപ്പിച്ചു. കിഴക്കന്‍ ദില്ലയിലെ സഹദാരയിലാണ് സംഭവം. സംഭവത്തിന് പിന്നില്‍ വ്യക്തിവിരോധമാണെന്ന് ഡല്‍ഹി പൊലീസ് പറഞ്ഞു. യുവതിക്ക് കൗണ്‍സലിങ് ഉള്‍പ്പടെയുള്ള മാനസിക പിന്തുണ നല്‍കി വരുന്നതായി പൊലീസ് അറിയിച്ചു. അനധികൃതമായി മദ്യവില്‍പ്പന നടത്തുന്നയാളുകള്‍ സംഘം ചേര്‍ന്ന് യുവതിയെ പീഡിപ്പിച്ചതാണ് സംഭവമെന്ന് ഡല്‍ഹി കമ്മീഷന്‍ ഓഫ് വിമന്‍ അധ്യക്ഷ സ്വാതി മലിവാള്‍ പറഞ്ഞു. ഡല്‍ഹി പൊലീസിന് നോട്ടീസ് അയച്ചതായും യുവതിക്കും കുടുംബത്തിനും പൊലീസ് സമ്പൂര്‍ണ പരിരക്ഷ ഉറപ്പുവരുത്തണമെന്നും സ്വാതി കൂട്ടിച്ചേര്‍ത്തു. സമീപകാലത്ത് ആത്മഹത്യ ചെയ്ത യുവാവിന്റെ കുടുംബമാണ് യുവതിയെ അപമാനിച്ചതിന് പിന്നില്‍ എന്ന് തെളിഞ്ഞു. യുവാവിന്റെ ആത്മഹത്യയ്ക്ക് കാരണം പീഡനത്തിനിരയായ യുവതിയാണെന്ന് കുടുംബാംഗങ്ങള്‍ ആരോപിക്കുന്നു. യുവാവിന്റെ അമ്മാവനാണ് 20-കാരിയെ വീട്ടില്‍ നിന്ന് പിടിച്ചിറക്കി സമൂഹമധ്യത്തില്‍ അപമാനിക്കാന്‍ മുന്നില്‍ നിന്നത്. യുവാവിന്റെ മരണശേഷം വാടകവീട്ടില്‍ കുഞ്ഞിന്റെയൊപ്പം താമസിക്കുകയായിരുന്നു യുവതി.