രാഷ്ട്രീയ നേതാക്കള്‍ക്കെതിരെ ക്രിമിനല്‍ കേസുകള്‍ കെട്ടിക്കിടക്കുന്നു; അമിക്കസ് ക്യൂറി സുപ്രീം കോടതിയില്‍

പാര്‍ലമെന്റ് അംഗങ്ങള്‍ (എംപിമാര്‍), നിയമസഭാ സാമാജികര്‍ (എംഎല്‍എമാര്‍) എന്നിവര്‍ക്കെതിരായ കേസുകള്‍ കെട്ടിക്കിടക്കുന്നതായി അമിക്കസ് ക്യൂറി സുപ്രീം കോടതിയെ അറിയിച്ചു. ആകെ 4,984 ക്രിമിനല്‍ കേസുകലാണ് രാജ്യത്തെ വിവിധ കോടതികളില്‍ കെട്ടിക്കിടക്കുന്നത്. കഴിഞ്ഞ മൂന്ന് വര്‍ഷത്തിനിടെ 862 കേസുകളുടെ വര്‍ധനയും ഉണ്ടായതായി അമിക്കസ് ക്യൂറി കോടതിയില്‍ വ്യക്തമാക്കി. ''സുപ്രീം കോടതിയുടെ നിര്‍ദ്ദേശങ്ങളും നിരന്തര നിരീക്ഷണവും ഉണ്ടായിരുന്നിട്ടും, 4,984 കേസുകള്‍ തീര്‍പ്പാക്കാതെ കിടക്കുന്നുണ്ട്. 1,899 കേസുകള്‍ അഞ്ച് വര്‍ഷത്തിലേറെ പഴക്കമുള്ളതാണ്. 2018 ഡിസംബര്‍ വരെ തീര്‍പ്പുകല്‍പ്പിക്കാത്ത ആകെ കേസുകളുടെ എണ്ണം 4,110 ഉം 2020 ഒക്ടോബര്‍ വരെ 4,859 ഉം ആയിരുന്നു എന്നത് ശ്രദ്ധിക്കേണ്ടതാണ്. 2018 ഡിസംബര്‍ 4 ന് ശേഷം 2,775 കേസുകള്‍ തീര്‍പ്പാക്കിയതിന് ശേഷവും, എംപിമാര്‍ / എംഎല്‍എമാര്‍ക്കെതിരായ കേസുകള്‍ 4,122 ല്‍ നിന്ന് 4,984 ആയി ഉയര്‍ന്നു.'' അമിക്കസ് ക്യൂറി സമര്‍പ്പിച്ച റിപ്പോര്‍ട്ടില്‍ പറയുന്നു. നിയമനിര്‍മ്മാതാക്കള്‍ക്കെതിരെ ക്രിമിനല്‍ കേസുകള്‍ വിചാരണ ചെയ്യുന്നതിനും ശിക്ഷിക്കപ്പെട്ടവരെ നിയമസഭയില്‍ നിന്നും പുറത്താക്കുന്നതിനും പ്രത്യേക കോടതികള്‍ സ്ഥാപിക്കണമെന്ന് ആവശ്യപ്പെട്ട് 2016-ല്‍ അഭിഭാഷകനായ അശ്വിനി കുമാര്‍ ഉപാധ്യായ സമര്‍പ്പിച്ച ഹര്‍ജിയിലാണ് റിപ്പോര്‍ട്ട് സമര്‍പ്പിച്ചത്. 4,984 കേസുകളില്‍ 3,322 എണ്ണം മജിസ്റ്റീരിയല്‍ കേസുകളും 1,651 സെഷന്‍ കേസുകളുമാണ്. തീര്‍പ്പാക്കാതെ കിടക്കുന്ന ഇത്തരം കേസുകളില്‍ 1,899 എണ്ണം അഞ്ച് വര്‍ഷത്തിലധികം പഴക്കമുള്ളവയാണെന്നും 1,475 കേസുകള്‍ രണ്ടിനും അഞ്ച് വര്‍ഷത്തിനും ഇടയില്‍ തീര്‍പ്പുകല്‍പ്പിക്കാത്തവയാണ്. ക്രിമിനല്‍ പശ്ചാത്തലമുള്ള കൂടുതല്‍ പേര്‍ പാര്‍ലമെന്റിലും സംസ്ഥാന അസംബ്ലികളിലും സ്ഥാനങ്ങള്‍ വഹിക്കുന്നുണ്ടെന്നും തീര്‍പ്പാക്കാത്ത ക്രിമിനല്‍ കേസുകള്‍ വേഗത്തില്‍ തീര്‍പ്പാക്കുന്നതിന് അടിയന്തരവും കര്‍ശനവുമായ നടപടികള്‍ സ്വീകരിക്കേണ്ടത് അത്യന്താപേക്ഷിതമാണെന്നും റിപ്പോര്‍ട്ടില്‍ പറയുന്നു.