കേരളത്തിലെ പാര്‍ട്ടിയില്‍ നിലവില്‍ വിഭാഗീയത ഇല്ല; കോടിയേരി ബാലകൃഷ്ണന്‍

കേരളത്തിലെ പാര്‍ട്ടിയില്‍ നിലവില്‍ വിഭാഗീയത ഇല്ലെന്ന് സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. ഒരു ഘട്ടത്തില്‍ വിഭാഗീയത ഉണ്ടായിരുന്നു. ഇന്ന് അത്തരം സാഹചര്യമില്ല. ചില മേഖലയില്‍ ചില പ്രശ്നങ്ങള്‍ ശ്രദ്ധയില്‍പ്പെട്ടിട്ടുണ്ടെന്നും അദ്ദേഹം പറഞ്ഞു. പേഴ്സണല്‍ സ്റ്റാഫ് അംഗങ്ങളുടെ പെന്‍ഷന്‍ തുടരുമെന്നും അദ്ദേഹം അറിയിച്ചു. മന്ത്രിമാരുടെ പേഴ്സണല്‍ സ്റ്റാഫിന്റെ പെന്‍ഷന്‍ കാലങ്ങളായി തുടര്‍ന്ന് പോരുന്നതാണെന്നും അദ്ദേഹം വ്യക്തമാക്കി. ഇതിനിടെ സര്‍ക്കാര്‍ ഗവര്‍ണര്‍ക്ക് വഴങ്ങിയെന്ന കാനം രാജേന്ദ്രന്റെ ആരോപണം തള്ളി കോടിയേരി. സര്‍ക്കാര്‍ ഒരു വിധത്തിലും ഗവര്‍ണര്‍ക്ക് വഴങ്ങിയിട്ടില്ല. ഗവര്‍ണര്‍ക്ക് സര്‍ക്കാര്‍ വഴങ്ങിയെന്നത് മാധ്യമ വ്യാഖ്യാനം മാത്രമാണ്. ഗവര്‍ണര്‍ സ്വീകരിച്ച നടപടി ഗവര്‍ണര്‍ തന്നെ തിരുത്തി. മുഖ്യമന്ത്രിയും ഗവര്‍ണരും തമ്മില്‍ കൂടിക്കാഴ്ച നടത്തുന്നതില്‍ തെറ്റില്ല. പ്രതിസന്ധിയുണ്ടാകുന്ന സാഹചര്യം വന്നാല്‍ പാര്‍ട്ടി ഇടപെടുമെന്ന് കോടിയേരി കൂട്ടിച്ചേര്‍ത്തു. ഭരണഘടനാ ബാധ്യത നിറവേറ്റേണ്ട ഗവര്‍ണര്‍ വിലപേശിയത് ശരിയായില്ലെന്ന് സി പി ഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞിരുന്നു. ഗവര്‍ണര്‍ക്ക് സര്‍ക്കാര്‍ വഴങ്ങിയ രീതിയും ശരിയായില്ല. മന്ത്രി സഭ അംഗീകരിച്ച നയപ്രഖ്യാപനം വായിക്കാന്‍ ഗവര്‍ണര്‍ക്ക് ഭരണഘടനാപരമായ ബാധ്യതയുണ്ട്. ഗവര്‍ണറെ കാണാന്‍ പോയത് എന്തിനെന്ന് മുഖ്യമന്ത്രിയോട് ചോദിക്കണം. രാജ് ഭവനില്‍ നടക്കുന്നത് ശരിയായ നടപടിയെന്ന് ജനങ്ങള്‍ കരുതുന്നില്ലെന്നും കാനം രാജേന്ദ്രന്‍ ആരോപിച്ചിരുന്നു.