പി.ടി. നിലപാടുകളില്‍ വിട്ടുവീഴ്ചയില്ലാത്ത നേതാവ്: മുഖ്യമന്ത്രി; പോരാളിയെന്ന് സതീശന്‍

സജീവവും ചടുലവുമായി ഇടപെട്ടു സ്വന്തമായ നിലപാടുകള്‍ ഉണ്ടായിരുന്ന നേതാവാണ് അന്തരിച്ച എംഎല്‍എ പി.ടി.തോമസെന്ന് മുഖ്യമന്ത്രി പിണറായി വിജയന്‍. നിലപാടുകളില്‍ വിട്ടുവീഴ്ച ചെയ്തില്ല. ചില നിലപാടുകള്‍ വ്യക്തിനിഷ്ഠമായിരുന്നു. ഇത് പി.ടിയെ അദ്ദേഹത്തിന്റെ പാര്‍ട്ടിയില്‍ പോലും വേറിട്ട വ്യക്തിത്വമാക്കി. ദുഃഖകരമാണ് പി.ടിയെ നഷ്ടപ്പെട്ടത്. പരിസ്ഥിതി എഴുത്ത്, വായന എന്നിവ കൂടെ കൊണ്ടുനടന്നു. മതനിരപേക്ഷത കുടുംബത്തിലും രാഷ്ട്രീയത്തിലും കൂടെക്കൂട്ടി. കേട്ടില്ല എന്നു നടിക്കാന്‍ ആര്‍ക്കും കഴിയാത്ത ശബ്ദമായിരുന്നു പി.ടിയുടേതെന്നും മുഖ്യമന്ത്രി സഭയില്‍ അനുസ്മരിച്ചു. ജാഗ്രതയോടെയും ശക്തമായും ഇടപെട്ട സാമാജികനായിരുന്നു പി.ടി.തോമസെന്ന് സ്പീക്കറും പറഞ്ഞു. പി.ടിയുടെ കടന്നുപോക്ക് ഉള്‍ക്കൊള്ളാനാവുന്നില്ലെന്ന് പ്രതിപക്ഷനേതാവ് വി.ഡി.സതീശന്‍ പറഞ്ഞു. നിലപാടുകളില്‍ ഉറച്ചു നിന്നു. വിദ്യാര്‍ഥി യുവജന രാഷ്ട്രീയത്തിലെ അഗ്‌നി അവസാനം വരെ കെടാതെ സൂക്ഷിച്ചു. ഓരോ നിയോഗവും പൂര്‍ണമായി നടപ്പാക്കി. പരിസ്ഥിതി നിലപാടുകള്‍ പല പ്രയാസങ്ങളും നേരിട്ടെങ്കിലും പിന്നോട്ടു പോയില്ല. പി.ടി. ഒരു പോരാളിയായിരുന്നു. എല്ലാ പോരാട്ടങ്ങളുടെയും കുന്തമുനയായി നിന്നു. ജാതിമത ചിന്തകള്‍ക്ക് അതീതനായി നിന്നു. വരും നാളുകളില്‍ പി.ടിയുടെ ഓര്‍മകള്‍ വഴിയിലെ പ്രകാശമായിരിക്കുമെന്നും സതീശന്‍ അനുസ്മരിച്ചു.