ജലറ്റിന്‍ സ്റ്റിക്ക് ഘടിപ്പിച്ചെത്തി ഭാര്യയെ പുണര്‍ന്നു; ദമ്പതികള്‍ക്ക് ദാരുണാന്ത്യം

അഹമ്മദാബാദ്: ശാരീരികവും മാനസികവുമായ പീഡനത്തെ തുടര്‍ന്ന് അകന്നു കഴിഞ്ഞിരുന്ന ഭാര്യയെ ജലറ്റിന്‍ സ്റ്റിക്ക് ഉപയോഗിച്ച് ഭര്‍ത്താവ് കൊലപ്പെടുത്തി. ഗുജറാത്തിലെ ആരവല്ലി ജില്ലയിലാണ് ദാരുണ സംഭവം. ആരവല്ലി സ്വദേശിയായ ലാല പാഗി (45), ഭാര്യ ശ്രദ്ധ എന്നിവരാണ് സ്ഫോടനത്തില്‍ മരിച്ചത്. പ്രശ്‌നങ്ങള്‍ രമ്യമായി പരിഹരിക്കാനെന്ന പേരില്‍ കഴിഞ്ഞ വ്യാഴാഴ്ച രാത്രി എട്ടിന് ശ്രദ്ധയുടെ വീട്ടിലെത്തിയ ലാല പാഗി, പൊടുന്നനെ ഭാര്യ ശ്രദ്ധയെ കടന്നു പിടിക്കുകയായിരുന്നു. ഭാര്യയെ നെഞ്ചോട് ചേര്‍ത്ത് ശക്തമായി ആലിംഗനം ചെയ്തതോടെ സ്‌ഫോടകവസ്തു പൊട്ടിത്തെറിച്ച് നിമിഷങ്ങള്‍ക്കുള്ളില്‍ ഇരുവരും മരിച്ചെന്നു പൊലീസ് പറഞ്ഞു. ഒന്നര മാസമായി ലാല പാഗിയില്‍നിന്ന് വേര്‍പിരിഞ്ഞ് കഴിയുകയായിരുന്നു ഭാര്യ. ഒരുമിച്ച് ജീവിക്കാന്‍ തയാറല്ലെന്ന് ശ്രദ്ധ നിലപാട് എടുത്തതോടെ കൊല്ലാന്‍ തീരുമാനിക്കുകയായിരുന്നുവെന്നു പൊലീസ് പറയുന്നു. മീന്‍പിടിക്കാനായി ഉപയോഗിക്കുന്ന ജലറ്റിന്‍ സ്റ്റിക്കാണ് പാഗി ശരീരത്തില്‍ കെട്ടിവച്ചത്. മീന്‍പിടിത്തക്കാരുടെ പക്കല്‍നിന്നും വാങ്ങിയശേഷം ഇതിന്റെ ഉപയോഗത്തെക്കുറിച്ച് മനസ്സിലാക്കുകയായിരുന്നു. പാഗിയില്‍നിന്നും വീട്ടുകാരില്‍നിന്നുമുള്ള പീഡനങ്ങള്‍ സഹിക്കാതെ വന്നപ്പോഴാണ് ശ്രദ്ധ സ്വന്തം വീട്ടില്‍ അഭയം പ്രാപിച്ചതെന്നു സഹോദരന്‍ പൊലീസിനോട് പറഞ്ഞു. ഇവര്‍ക്ക് 21 വയസ്സുള്ള മകനുണ്ട്. ആദിവാസി മേഖലകളില്‍ മത്സ്യം പിടിക്കാന്‍ ഇത്തരം സ്‌ഫോടകവസ്തുക്കള്‍ ഉപയോഗിക്കുന്നുണ്ടെന്ന് ഗാന്ധിനഗര്‍ റേഞ്ച് ഐജിപി അഭയ് ചുദാസമ പറഞ്ഞു. സംഭവത്തില്‍ പൊലീസ് അന്വേഷണം തുടങ്ങി.