കാമുകി ഒരു കോടി ചോദിച്ചു, പ്രണയം തകര്‍ന്നു; യുവാവ് ജീവനൊടുക്കി

അഹമ്മദാബാദ്: ആവശ്യപ്പെട്ട പണം ലഭിക്കാതെ വന്നപ്പോള്‍ കാമുകി പ്രണയബന്ധത്തില്‍നിന്ന് പിന്‍മാറിയതിനു പിന്നാലെ യുവാവ് ആത്മഹത്യ ചെയ്തു. ഗുജറാത്തിലെ നരോദ സ്വദേശിയായ ലഖന്‍ മഖിജയാണ് ആത്മഹത്യ ചെയ്തത്. കാനഡയിലേക്ക് കുടിയേറാനായി കാമുകി ഒരു കോടി രൂപയാണ് ആവശ്യപ്പെട്ടത്. യുവാവിന്റെ അമ്മ പെണ്‍കുട്ടിക്കെതിരെ പൊലീസില്‍ പരാതി നല്‍കി. എന്നാല്‍ പൊലീസ് ഇതുവരെ കേസെടുക്കാന്‍ തയാറായിട്ടില്ലെന്നും നീതി ലഭ്യമാകുന്നില്ലെന്നും ലഖന്റെ ഇളയ സഹോദരന്‍ സന്ദീപ് മഖിജ പറയുന്നു. പണം ലഭിക്കാത്തതിനെത്തുടര്‍ന്ന് യുവതി പ്രണയബന്ധത്തില്‍നിന്ന് പിന്‍മാറിയെന്നും അതില്‍ മനംനൊന്താണ് ലഖന്‍ ആത്മഹത്യ ചെയ്തതെന്നും ഇവര്‍ പറയുന്നു. യുവാവ് വീട്ടിലെ സ്വീകരണമുറിയിലുള്ള ഫാനില്‍ തൂങ്ങി മരിക്കുകയായിരുന്നു. നരോദയിലെ അറിയപ്പെടുന്ന ബിസിനസ് കുടുംബമാണെങ്കിലും യുവതി ആവശ്യപ്പെട്ട വലിയ തുക നല്‍കാന്‍ ലഖന്റെ കുടുംബത്തിന് കഴിഞ്ഞില്ല. മകനും കാമുകിയും തമ്മിലുള്ള വാട്ട്സാപ്പ് സംഭാഷണങ്ങള്‍ അമ്മ മഖിജ തെളിവായി നല്‍കി. ഫോണ്‍ തങ്ങള്‍ക്ക് ലഭിച്ചപ്പോള്‍ വാട്‌സാപ്പ് സംഭാഷണങ്ങള്‍ ഡിലീറ്റ് ചെയ്യപ്പെട്ടിരുന്നുവെന്നും മെസേജുകള്‍ വീണ്ടെടുക്കാന്‍ സാങ്കേതിക സഹായം തേടിയിട്ടുണ്ടെന്നും പൊലീസ് പറയുന്നു.