പുട്ടിന് തെറ്റി,എന്തും നേരിടാന്‍ തയാര്‍;യുഎസ് യുദ്ധത്തില്‍ നേരിട്ട് പങ്കെടുക്കില്ല: ബൈഡന്‍

അമേരിക്കന്‍ ജനത യുക്രെയ്‌ന്റെ ഒപ്പമെന്നു യുഎസ് പ്രസിഡന്റ് ജോ ബൈഡന്‍. പാര്‍ലമെന്റില്‍ നടത്തിയ പ്രസംഗത്തില്‍ റഷ്യന്‍ ആക്രമണത്തെ ബൈഡന്‍ ശക്തമായി അപലപിച്ചു. പാര്‍ലമെന്റ് ഒന്നടങ്കം എഴുന്നേറ്റുനിന്നാണു യുക്രെയ്‌നു പിന്തുണ അറിയിച്ചത്. ചില അംഗങ്ങള്‍ യുക്രെയ്ന്‍ പതാക വീശിയാണു ബൈഡന്റെ പ്രസംഗം ശ്രവിച്ചത്. പ്രകോപനമില്ലാതെയാണു യുക്രെയ്ന്‍ ആക്രമിക്കപ്പെട്ടതെന്നു ബൈഡന്‍ പറഞ്ഞു. റഷ്യന്‍ പ്രസിഡന്റ് വ്‌ലാഡിമിര്‍ പുട്ടിന്റെ ആക്രമണത്തെ നേരിടാന്‍ പാശ്ചാത്യ ലോകം ഒറ്റക്കെട്ടാണ്, പുട്ടിന്‍ ഒറ്റപ്പെട്ടു. എന്താണു സംഭവിക്കുന്നതെന്ന് അദ്ദേഹത്തിനു യാതൊരു അറിവുമില്ല. യുക്രെയ്‌നെയും ലോകത്തെതന്നെയും ഭരിക്കാമെന്നാണു പുട്ടിന്‍ കരുതിയത്. കരുത്തരായ യുക്രെയ്ന്‍ ജനതയുടെ പ്രതിരോധമതില്‍ പുട്ടിന്റെ ചിന്തയിലുണ്ടായിരുന്നില്ല. യുക്രെയ്ന്‍ പ്രസിഡന്റ് വൊളൊഡിമിര്‍ സെലെന്‍സ്‌കി മുതല്‍ സാധാരണക്കാര്‍ വരെ റഷ്യന്‍ പട്ടാളത്തിനു മുന്നില്‍ ഭയരഹിതരായി നിലകൊണ്ടു. ഇതു ലോകത്തിനു പ്രചോദനമാണ്. യുദ്ധം ഒഴിവാക്കാനുള്ള നയതന്ത്ര ശ്രമങ്ങളെ റഷ്യ കണക്കിലെടുത്തില്ല. പാശ്ചാത്യ ലോകവും നാറ്റോയും പ്രതികരിക്കില്ലെന്നാണ് അദ്ദേഹം കരുതിയത്. പുട്ടിനു തെറ്റി, ഞങ്ങള്‍ എന്തും നേരിടാന്‍ തയാറാണ്. എന്നാല്‍ യുഎസ് നേരിട്ട് യുദ്ധത്തില്‍ പങ്കെടുക്കില്ല. റഷ്യയ്‌ക്കെതിരായ ഉപരോധം കടുപ്പിക്കും. അമേരിക്കന്‍ വ്യോമപാതയില്‍ റഷ്യന്‍ വിമാനങ്ങള്‍ക്കു വിലക്കേര്‍പ്പെടുത്തിയെന്നും ബൈഡന്‍ പറഞ്ഞു.