ആക്ഷേപഹാസ്യത്തിലൂടെ സര്‍ക്കാരിനെ വിമര്‍ശിച്ച മാധ്യമപ്രവര്‍ത്തകന്‍ അറസ്റ്റില്‍

റായ്പൂര്‍: ആക്ഷേപഹാസ്യത്തിലൂടെ ഛത്തീസ്ഗഡ് സര്‍ക്കാരിനെ വിമര്‍ശിച്ച മാധ്യമപ്രവര്‍ത്തകന്‍ അറസ്റ്റില്‍. 'ഇന്ത്യ റൈറ്റേഴ്‌സ്' മാസികയുടെ എഡിറ്റര്‍ നിലേഷ് ശര്‍മയെയാണ് ലേഖനമെഴുതിയതിന്റെ പേരില്‍ കോണ്‍ഗ്രസ് സര്‍ക്കാര്‍ അറസ്റ്റ് ചെയ്തത്. കോണ്‍ഗ്രസ് പ്രവര്‍ത്തകനായ ഖിലവന്‍ നിഷാദാണ് മാധ്യമപ്രവര്‍ത്തകനെതിരെ റായ്പൂര്‍ സൈബര്‍ പൊലീസില്‍ പരാതി നല്‍കിയത്. നിലേഷ് ശര്‍മയുടെ 'ഘുര്‍വാ കേ മാതി' കോളത്തില്‍ എഴുതുന്ന ലേഖനങ്ങളിലെ സാങ്കല്‍പിക കഥാപാത്രങ്ങള്‍ സംസ്ഥാനത്തെ മന്ത്രിമാരുമായും കോണ്‍ഗ്രസ് നിയമസഭാംഗങ്ങളുമായും സാമ്യമുള്ളതായി ഖിലവന്‍ നിഷാദ് ആരോപിച്ചു. തന്റെ കോളത്തില്‍ മന്ത്രിമാര്‍ക്കെതിരെ അപകീര്‍ത്തികരമായ പരാമര്‍ശങ്ങള്‍ ഉപയോഗിച്ചതായും ആരോപണമുണ്ട്. ഇത് മന്ത്രിമാര്‍ക്കിടയില്‍ ഭിന്നതയുണ്ടാക്കിയെന്നും പരാതിയില്‍ പറയുന്നു. തെറ്റായ വിവരങ്ങളും കിംവദന്തികളും ഉള്‍പ്പെടുത്തി ലേഖനങ്ങള്‍ എഴുതിയതിന് ശര്‍മക്കെതിരെ എഫ്.ഐ.ആര്‍ രജിസ്റ്റര്‍ ചെയ്തിട്ടുണ്ടെന്ന് റായ്പൂര്‍ പൊലീസ് പറഞ്ഞു. വലതുപക്ഷ അനുഭാവിയായാണ് ശര്‍മ അറിയപ്പെടുന്നത്. അതേസമയം, മാധ്യമപ്രവര്‍ത്തകനെ അറസ്റ്റ് ചെയ്ത കോണ്‍ഗ്രസ് സര്‍ക്കാരിന്റെ നടപടിക്കെതിരെ രൂക്ഷവിമര്‍ശനങ്ങളാണ് ഉയരുന്നത്. 2018ല്‍ സര്‍ക്കാര്‍ രൂപീകരിച്ചതിന് പിന്നാലെ മാധ്യമപ്രവര്‍ത്തകര്‍ക്ക് നേരെ നടക്കുന്ന അക്രമങ്ങളില്‍ നിന്ന് സംരക്ഷിക്കാന്‍ നിയമം കൊണ്ടുവരുമെന്ന് കോണ്‍ഗ്രസ് വാഗ്ദാനം ചെയ്തിരുന്നു. മുന്‍ ബി.ജെ.പി സര്‍ക്കാരിനെ വിമര്‍ശിച്ച് രാഷ്ട്രീയ ലേഖനങ്ങള്‍ അദ്ദേഹം പ്രസിദ്ധീകരിച്ചിട്ടുണ്ടെന്നും പൊലീസ് പറഞ്ഞു.