ഉത്തര്‍പ്രദേശ് നിയമസഭാ തെരഞ്ഞെടുപ്പില്‍ കോണ്‍ഗ്രസിനേറ്റത് ചരിത്രത്തിലെ ഏറ്റവും വലിയ തിരിച്ചടി

ഉത്തര്‍പ്രദേശ് നിയമസഭാ തെരഞ്ഞെടുപ്പില്‍ കോണ്‍ഗ്രസിനേറ്റത് ചരിത്രത്തിലെ ഏറ്റവും വലിയ തിരിച്ചടി. 399 സീറ്റുകളില്‍ മത്സരിച്ച കോണ്‍ഗ്രസിന് 387 സീറ്റുകളിലും കെട്ടിവെച്ച കാശ് പോയെന്ന് തെരഞ്ഞെടുപ്പ് കമ്മീഷന്‍ വെബ്സൈറ്റിലെ കണക്കുകള്‍ വ്യക്തമാക്കുന്നു. ആകെ കിട്ടിയത് വോട്ട് വെറും 2.4 ശതമാനം മാത്രവും. തെരഞ്ഞെടുപ്പില്‍ കേവലം 33 സീറ്റുകളില്‍ മത്സരിച്ച രാഷ്ട്രീയ ലോക് ദളിന് (ആര്‍എല്‍ഡി) 2.9 ശതമാനം വോട്ടുകള്‍ നേടാന്‍ കഴിഞ്ഞു. ആര്‍എല്‍ഡിയുടെ മൂന്ന് സ്ഥാനാര്‍ത്ഥികള്‍ക്ക് കെട്ടിവെച്ച കാശ് നഷ്ടമായിട്ടുണ്ട്. കോണ്‍ഗ്രസിന് സമാനമായി തിരിച്ചടിയാണ് മായാവതിയുടെ ബിഎസ്പിയ്ക്കും ഇത്തവണ ഉണ്ടായത്. ഒറ്റയ്ക്ക് 403 സീറ്റുകളിലും മത്സരിച്ച ബിഎസ്പിയുടെ 290 സ്ഥാനാര്‍ത്ഥികള്‍ക്കും (72%) കെട്ടിവച്ച കാശ് പോയി. യുപിയില്‍ രണ്ടാം തവണയും ജയിച്ചു കയറിയെങ്കിലും മൂന്ന് ബിജെപി സ്ഥാനാര്‍ത്ഥികള്‍ക്കും കെട്ടിവച്ച കാശ് നഷ്ടമായി. 376 സീറ്റുകളിലാണ് ബിജെപി ഇത്തവണ മത്സരിച്ചത്. 347 സീറ്റുകളില്‍ മത്സരിച്ച മുഖ്യപ്രതിപക്ഷമായ സമാജ്വാദി പാര്‍ട്ടിയുടെ ആറ് സ്ഥാനാര്‍ത്ഥികള്‍ക്കും കെട്ടിവെച്ച കാശ് നഷ്ടമായെന്ന് കണക്കുകള്‍ വ്യക്തമാക്കുന്നു. ബിജെപിയുടെ സഖ്യകക്ഷികളായ അപ്നാ ദള്‍ (സോനേലാല്‍ വിഭാഗം), നിഷാദ് (നിര്‍ബല്‍ ഇന്ത്യന്‍ ശോഷിത് ഹമാരാ ആം ദള്‍) എന്നിവര്‍ക്ക് തെരഞ്ഞെടുപ്പില്‍ മികച്ച പ്രകടനം കാഴ്ചവെയ്ക്കാനായി. 27 സീറ്റുകളില്‍ മത്സരിച്ചെങ്കിലും ഒരിടത്ത് പോലും ഇരുപാര്‍ട്ടികള്‍ക്കും കെട്ടിവച്ച കാശ് നഷ്ടമായില്ല. എസ്പിയുടെ പങ്കാളികളായിരുന്ന എസ്ബിഎസ്പി, അപ്ദാ ദള്‍ (കമേരാവാദി) എന്നിവര്‍ 25 സീറ്റുകളില്‍ മത്സരിച്ചപ്പോള്‍ 8 പേര്‍ക്കും കെട്ടിവച്ച കാശ് നഷ്ടമായി. ഒരു നിയോജക മണ്ഡലത്തില്‍ പോള്‍ ചെയ്ത മൊത്തം വോട്ടിന്റെ ആറിലൊന്ന് പോലും കിട്ടാത്ത സ്ഥാനാര്‍ത്ഥികള്‍ക്കാണ് കെട്ടിവച്ച കാശ് നഷ്ടമാവുക. ഇത്തവണ ഉത്തര്‍പ്രദേശ് തെരഞ്ഞെടുപ്പില്‍ മത്സരിച്ച 4,442 സ്ഥാനാര്‍ത്ഥികളില്‍ 3,522 പേര്‍ക്കും (80%) കെട്ടിവച്ച കാശ് നഷ്ടമായെന്നാണ് കണക്ക്.